Վերջերս WikiLeaks-ի հրապարակած ԱՄՆ Պետքարտուղարության գաղտնի հաղորդագրություններից մեկում, որը ներկայացնում էր Ադրբեջանի նախագահ Իլհամ Ալիևի և ԱՄՆ փոխպետքարտուղար Նիքոլաս Բեռնսի միջև` 2010թ. փետրվարի վերջին կայացած խոսակցությունը` ուշադրության արժանացավ միայն մի դրվագ, երբ Ադրբեջանի նախագահը ՌԴ նախագահ Դմիտրի Մեդվեդևի և վարչապետ Վլադիմիր Պուտինի միջև պատկերավոր համեմատություն էր անցկացրել` շեշտելով, թե` «երկու գլուխ մեկ կաթսայում չի կարող եփվել»:
Այս հաղորդագրության մեջ, սակայն, մի ուշագրավ պահ կա. Ալիևը Բեռնսին պատմել է, որ 2010թ. հունվարի 25-ին Դ.Մեդվեդևի նախաձեռնությամբ` Սոչիում կայացած Հայաստանի, Ադրբեջանի և ՌԴ առաջնորդների եռակողմ հանդիպմանը Ս.Սարգսյանը առաջարկել է ԼՂ վերջնական կարգավիճակի վերաբերյալ հանրաքվեի անցկացման կոնկրետ ժամկետներ սահմանել, իսկ դա, ըստ Ալիևի, խախտում է համաձայնության ողջ կառուցվածքը, համաձայն որոնց` հնարավոր հանրաքվեն ժամկետներ չպետք է սահմանի:
«Առաջին լրատվականի» անանուն աղբյուրները պնդում են, որ 2010թ . հունվարին Սոչիում Ս.Սարգսյանի կողմից այդ առաջարկի ներկայացման համար հիմք են ծառայել 2009թ. աշնանը ՀՀ առաջին նախագահ Լևոն Տեր-Պետրոսյանի ելույթները, որոնցից մեկում Կոնգրեսի առաջնորդը մասնավորապես նշել էր.
«Ո՞վ է կազմակերպելու հանրաքվեն՝ ՄԱ՞Կ-ը, ԵԱ՞ՀԿ-ը, Ադրբեջա՞նը, թե՞ Ղարաբաղը, ե՞րբ է տեղի ունենալու հանրաքվեն, ո՞ր տարածքում է անցկացվելու հանրաքվեն, ովքե՞ր են մասնակցելու հանրաքվեին, ինչպե՞ս է ձևակերպվելու հանրաքվեի դրված հարցը, ինչպիսի՞ իրավական հետևանքներ է ունենալու հանրաքվեն…»: