Ատենակալների ռազմական դատարանը Տեխասում Լեքլենդի ռազմաօդային ուժերի ուսումնական բազայի հրահանգչին մեղավոր է ճանաչել բռնաբարության և այլ սեքսուալ բնույթի հանցագործությունների մեջ: Այս մասին հաղորդում է Associated Press-ը:
Ավագ սերժանտ Լուիս Ուոլքերը մեղադրվում էր մեկ կուրսանտի բռնաբարության և ևս 10-ի նկատմամբ ոչ պատշաճ վարք դրսևորելու մեջ:
Ուոլքերից բացի` հետաքննություն է անցկացվում բազայի ևս 11 հրահանգիչների նկատմամբ: Ընդհանուր առմամբ մեղադրանք է հարուցվել 6 հրահանգիչների դեմ, ընդ որում` Ուոլքերի հանցագործությունն ամենալուրջն է: Այդ գործով որպես տուժած հանդես է գալիս 31 կին:
Մեղադրյալը սառնասրտորեն է ընդունել ատենակալների վճիռը: Նրան սպասվում է ցմահ ազատազրկում:
Լեքլենդի բազայում պատրաստականություն են անցնում ԱՄՆ ռազմաօդային ուժերի բոլոր զինծառայողները: Ամեն տարի բազան ավարտում է 35 հազար մարդ, որոնց մեկ հինգերորդը կին է: Լեքլենդում աշխատում է շուրջ 475 հրահանգիչ, 90 տոկոսը՝ տղամարդ:
