«Մենք պետք է այնպիսի դաշտ ստեղծենք, որը միջազգային նորմատիվներին է ենթարկվում և հրապուրիչ է ներդրողների համար, թե չէ բարձր հարկեր դնելը դեռ չի նշանակում, որ խնդիրները լուծված են: Պետք է ապահովել միջազգային ստանդարտները, հակառակ դեպքում ոչ ոք չի գա Հայաստան ներդրումներ անելու»,- Բնօգտագործման և բնական պաշարների մասին օրենքում և մի շարք այլ օրենքներում կառավարության ներկայացրած օրենսդրական փոփոխությունների փաթեթին անդրադառնալով՝ կարծիք հայտնեց էներգետիկայի և բնական պաշարների նախարար Արմեն Մովսիսյանը:
Ներկայացվող փոփոխություններով նախատեսվում է վերացնել բնօգտագործման լիցենզիայի տրամադրման կարգը: Արմեն Մովսիսյանը նկատեց, որ թույլտվությունը և լիցենզիան ընդամենը իրավաբանական ձևակերպումներ են, և որևէ նշանակություն չունի, թե դրա անունն ինչ է. «Մենք ունենք լիցենզիաների տրամադրման մասին օրենք, և հաշվի առնելով այն հանգամանքը, որ այստեղ որոշակի առանձնահատկություն կա, այդ պատճառով է լիցենզիան դուրս եկել, որպեսզի հակասություններ չառաջանան»:
Բնական պաշարների օգտագործումից ստացված հասույթից պետբյուջե գանձվող գումարի դրույքաչափը, ըստ օրենսգրքում առաջարկվող փոփոխությունների, պետք է սահմանի կառավարությունը, ինչը, սակայն, հստակ նշված չէ: Մովսիսյանը հստակեցնելով, նշեց, որ յուրաքանչյուր մետաղի համար սահմանվելու են առանձին դրույքաչափեր.
«Դրանք պետք է սահմանի կառավարությունը, քանզի վերջին մի քանի տարիների ընթացքում մենք ունեցանք որոշակի խնդիրներ, երբ ճգնաժամի ընթացքում մետաղների գները նվազեցին: Նման դեպքերում պետությունը պետք է հնարավորություն ունենա այդ դրույքաչափերը իջեցնելու, որպեսզի ներդրողները, գործող ընկերությունները չսնանկանան և կարողանան դիմանալ տնտեսությունում կատարվող փոփոխություններին: Այս դեպքում գները կարող են առաձգական լինել»:
