«Առաջին լրատվական»-ի այն դիտարկմանը, թե ինչպես է վերաբերվում համացանցում ակտիվ կուրսային աշխատանքներ և ռեֆերատներ առաջարկող այնպիսի կայքերին, ինչպիսիք են referat.am-ը, kursayin.am-ը, ԿԳ նախարարության հասարակայնության և տեղեկատվության վարչության պետ Արթուր Բաղդասարյանը պատասխանեց․
«Կրթության ոլորտում իրականացվող բարեփոխումները, և ընդհանրապես քաղաքականությունը, միտված են գիտելիքի խրախուսմանը և կրթության որակի բարձրացմանը։ Տեղեկատվական ժամանակակից տեխնոլոգիաները, անկախ նրանից՝ am է, ru, թե com, նման ծառայություններ առաջարկում են ամբողջ աշխարհին։ Պարզապես մենք խնդիրը տեսնում ենք նաև ուսանողի գիտելիքի խրախուսման և գիտելիքի կարևորման մեջ։ Հիմա բոլոր ամբիոնները կրեդիտային համակարգի ներդրմամբ ամեն ինչ անում են, որ ուսանողը ինքնուրույն աշխատանքը ընդլայնի, և վերահսկվի նման աշխատանքների օգտագործումը, այլապես եթե am-ը չի, com-ն է, միևնույն է, խնդիրը չի լուծվում։ Բացի դրանից, կան նաև այլ ծառայություններ, որոնք ևս նման ծառայություններ են առաջարկում»։
Ա. Բաղդասարյանի խոսքով՝ եթե ուսանողը գնում է այդ քայլին, ինքը կգտնի անհրաժեշտ նյութը որևէ տեղից։ «Կարևոր է, որ ուսանողը չգնա այդ քայլին, գիտակցի, որ ինքն ընդունվել է ինստիտուտ գիտելիք ստանալու։ Այժմ ներքին քննությունների համակարգը, ուսանող-դասախոս փոխհարաբերությունը, որը վերահսկում է աշխատանքի կատարման փուլային ընթացքը, կարծես թե խոչընդոտում կամ սահմանափակում է նման նյութերի օգտագործումը»։
