Եթե ՌԴ պետդուման անձեռնմխելիությունից զրկի պատգամավոր Աշոտ Եղիազարյանին, ապա նա կդատապարտվի մինչեւ 10 տարվա ազատազրկման` կազմակերպված խմբի կողմից կամ առանձնապես խոշոր չափերի մեքենայություններ կատարելու համար: ՌԴ գլխավոր դատախազ Յուրի Չայկան միջնորդություն է ստորագրել` Պետդումայի խոսնակ Բորիս Գրիզլովին ներկայացնելու համար, որով խնդրում է Պետդումայում Ժիրինովսկու գլխավորած Ռուսաստանի լիբերալ-դեմոկրատական կուսակցության պատգամավոր Աշոտ Եղիազարյանին զրկել անձեռնմխելիությունից: Այդ մասին տեղեկացնում են ռուսական լրատվամիջոցները: Մինչ այդ, Եղիազարյանի նկատմամբ քրեական գործ հարուցելու թույլտվություն տալու վերաբերյալ միջնորդություն էր եղել նաեւ ՌԴ քննչական կոմիտեի նախագահ Ալեքսանդր Բաստրիկինի կողմից, ինչը բավարարել էր Պետդուման: Քրգործի հիմք է հանդիսացել Աշոտ Եղիազարյանի երկու նախկին գործընկերների բողոքը: Ըստ այդմ, Եղիազարյանը հրաժարվել է ընկերոջից վերցրած պարտքը՝ 500 մլն ռուբլին, վերադարձնելուց. նա նաեւ մեղադրվում է առեւտրային կենտրոնի բաժնետոմսերի 20 տոկոսը ապօրինաբար ձեռք բերելու մեջ:
