Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր ավարտվեց Երևանի պետական համալսարանի իրավագիտության ֆակուլտետի քրեական իրավունքի ամբիոնի և նույն ամբիոնի դասախոս Արա Գաբուզյանի` պատվին, արժանապատվությանը և գործարար համբավին պատճառված վնասի հատուցման հրապարակայնորեն ներողություն խնդրելու և հերքման պարտավորեցնելու մասին հայցով դատաքննությունը ընդդեմ «Բանաձև» ՍՊԸ-ի և Սիրակ Եղիազարյանի:
Հիշեցնենք, որ պետհամալսարանը վիճարկում է «Ականատես» հաղորդման «Իրավախախտ իրավագետը» վերնագրով պատմության մեջ արծարծված տեղեկությունները:
Հայցվոր կողմը պահանջում է Սիրակ Եղիազարյանին, Սոնա Հարությունյանին, «Բանաձև» ՍՊԸ-ին պարտավորեցնել հրապարակային, բանավոր ներողություն խնդրել ԵՊՀ-ից և քրեական իրավունքի ամբիոնի վարիչ Արա Գաբուզյանից Հ1-ի այլ հեռուստահաղորդմամբ, քանի որ «Բանաձևն» այլևս չի հեռարձակվում Հ1-ով, ինչպես նաև դատարանի վճիռը հրապարակել http://akanates.banadzev.com ինտերնետային կայքում:
Հունիսի 30-ին դատարանը կհրապարակի այս գործով վճիռը: Այս մասին «Առաջին լրատվականին» հայտնեց ԵՊՀ քրեական ամբիոնի վարիչ Արա Գաբուզյանը:
Նշենք, որ հաղորդումը պատմում է Սիրակ Եղիազարյանի մասին, որը դիմել է մայր բուհի մագիստրատուրա, սակայն նրա գրավոր աշխատանքը անբավարար է գնահատվել առանց բովանդակությունը ստուգելու` միայն ծավալին նայելով: Ըստ հաղորդման` դասախոսը փորձել է դիմորդին ոստիկանությանը հանձնել միայն այն պատճառով, որ երիտասարդը համարձակվել է բողոքարկել:
Հաղորդաշարում Սիրակ Եղիազարյանը պատմում է, որ ընդունելության քննություն է հանձնել Երևանի պետական համալսարանի իրավագիտության ֆակուլտետի մագիստրատուրա ընդունվելու համար: Քննությունը հանձնելուց հետո պարզվել է, որ կտրվել է` ստանալով 5 միավոր, թեև մասնագետներն ասել են, որ իր գրավորն արժանի էր ավելի բարձր գնահատականի, քան ընդունվելու համար նվազագույն 8 միավորի շեմն է: Սիրակը բողոքարկել է քննության արդյունքը: Ըստ նրա` Ա. Գաբուզյանը իրեն կանչել է իր մոտ ու ասել, որ իրականում իրենք գրավորի բովանդակությանը չեն նայում, իրենց համար կարևոր է ծավալը: Հետո իրեն անվանել է դեմագոգ ու հեռախոսն է փնտրել, որ ոստիկանություն կանչի:
Հայցվորները նշում են, որ վերոնշյալը իրականությանը չհամապատասխանող արտահայտություն է, քանի որ քրեական իրավունքի ամբիոնի դասախոսները, այդ թվում նաև Արա Գաբուզյանը, նման բան Սիրակին չեն ասել: Իսկ պատասխանողի պնդումը համարում են զրպարտություն Քրեական իրավունքի ամբիոնի վերաբերյալ, քանի որ կասկածի տակ է դնում ամբիոնի դասախոսների կողմից գրավոր աշխատանքների արդար և օբյեկտիվ գնահատումը, ազդակ է ստեղծում այլ դիմորդների համար` կասկածելու ամբիոնի անաչառությանը:
Ըստ ԵՊՀ-ի` վերնագրի «Իրավախախտ» բառը զրպարտիչ կամ վիրավորական է քաղաքացիական իրավունքի ցանկացած սուբյեկտի համար: Այն առավել ևս վիրավորական և զրպարտիչ բնույթ ունի, երբ վերաբերում է դասախոս, իրավաբանական գիտությունների դոկտոր իրավաբանին:
Ըստ հայցվորների` ողջ հաղորդումը, ըստ էության, ուղղված է ԵՊՀ իրավագիտության ֆակուլտետի քրեական իրավունքի ամբիոնին զրպարտելուն, և դա ապացուցվում է հաղորդման վերջում հաղորդավարի հետևյալ արտահայտությամբ.
«Պատմությունը մեկ դասախոսի կամ մեկ ամբիոնի սխալի մասին է, սա դեռ չի նշանակում, որ ապականված է ամբողջ կրթական համակարգը, բայց որպեսզի մեկ մեղավորը պատժվի ու նրա վատ օրինակը մոլախոտի պես չտարածվի… »:
Հայցվորները համարում են, որ տպավորություն է ստեղծվում, որ հաղորդման ընթացքում խոսվում է ՀՀ-ում կոռուպցիայի օջախի մասին, որը շտապ պետք է մարել, և դրա առաջամարտիկն է դարձել «Ականատես» հաղորդաշարը: Հայցվորները ավելացնում են, որ հաղորդումը, դիտավորյալ նսեմացնելով հայցվորներին, փորձում է լսարան շահել և հիմնավորել դոնոր կազմակերպության կողմից կոռուպցիան քննադատելու համար ստացած գումարները:
Հայցվորները նաև կարծում են, որ հաղորդումը, ի դեմս հաղորդավարի հետևյալ արտահայտության` «Գուցե այս պահին, հերթական խաբեբային… », վիրավորում է նաև հայցվորներին` նրանց խաբեբա անվանելով:
Ելնելով վերոգրյալից` հայցվորները կարծում են, որ «Բանաձև» ՍՊԸ կողմից պատրաստվող և հեռարձակվող «Ականատես» հաղորդման ընթացքում վիրավորանքի և զրպարտության միջոցով արատավորվել են ԵՊՀ-ի, ԵՊՀ իրավագիտության ֆակուլտետի քրեական իրավունքի ամբիոնի և Քրեական իրավունքի ամբիոնի վարիչ, իրավագիտության դոկտոր Արա Գաբուզյանի պատիվը, արժանապատվությունը և գործարար համբավը:
