Այսօր շոկոլադի սիրահարները նշում են Շոկոլադի համաշխարհային օրը: Տոնը սահմանել են ֆրանսիացիները՝ 1995 թվականին:
Որոշ պատմաբաններ ենթադրում են, որ առաջին անգամ շոկոլադ պատրաստել են ացտեկները և այն անվանել «աստվածային սնունդ»: Իսպանացի նվաճողները, որոնք առաջինն են շոկոլադը Եվրոպա բերել, այն կնքել են «սև ոսկի» անվամբ և օգտագործել ֆիզիկական ուժի ամրացման և տոկունության նպատակով:
Ավելի ուշ Եվրոպայում շոկոլադի օգտագործումը սահմանափակվել է արիստոկրատների շրջաններում: Կանայք շոկոլադը համարում էին աֆրոդիզիակ՝ սեռական գրավչությունը բարձրացնող միջոց:
20-րդ դարի սկզբին շոկոլադը հասանելի դարձավ բոլորին:
Ինչպես հաստատել է ժամանակակից գիտությունը, շոկոլադում առկա են տարրեր, որոնք նպաստում են հոգեկան հանգստի վերականգնմանը: Մուգ շոկոլադը խթանում է էնդորֆինների՝ երջանկության հորմոնների առաջացմանը, որոնք բարձրացնում են տրամադրությունը և ամրացնում օրգանիզմը: Բացի այդ, վերջին շրջանում գիտնականները եկել էին նաև այն եզրակացության, որ կանոնավոր կերպով շոկոլադ օգտագործողները բարեկազմ են լինում:
