Հայաստանի ՊՆ քննչական ծառայությունից «Ազատություն» ռադիոկայանին հայտնել են, որ ժամկետային զինծառայող, փետրվարի 6-ին Հադրութի զորամասերից մեկում դաժան ծեծից մահացած Գևորգ Կոծինյանի գործով արդեն 4 ձերբակալված կա. շարքայիններ Տարոն Սուվարյանը և Վահե Աղաջանյանը կասկածվում են Քրեական օրենսգրքի 359 հոդվածի 2-րդ մասի 2-րդ կետով` «զինծառայողների փոխհարաբերություների կանոնագրքային կանոնները խախտելը նրանց միջև ստորադասության հարաբերությունների բացակայության դեպքում, որը կատարվել է մի խումբ անձանց կողմից», ինչպես նաև 112 հոդվածի 2-րդ մասի 6-րդ, 9-րդ և 14-րդ կետերով` «դիտավորությամբ առողջությանը ծանր վնաս պատճառելը, որը կատարվել է մի խումբ անձանց կողմից խուլիգանական դրդումներով` անզգուշությամբ առաջացնելով տուժողի մահը»:
Ձերբակալվել է նաև կրտսեր սերժանտ Մարգար Դավթյանը, որը կասկածվում է ՀՀ քրօրի 359 հոդվածի 2-րդ մասի 2-րդ կետով, նաև` 38-359 հոդվածի 2-րդ մասի 2-րդ կետով /նշված հանցագործությանը օժանդակելը/, 112 հոդվածի 2-րդ մասի 6-րդ, 9-րդ, 14-րդ կետերով, և 375 հոդվածի առաջին մասով` «իշխանության չարաշահումը և իշխանության անգործությունը»: Ձերբակալվել է նաև ավագ լեյտենանտ Արմեն Ռաֆայելյանը, ով կասկածվում է 375 հոդվածի առաջին մասով: Նշանակվել է Կոտինյանի դիակի դատաբժշկական փորձաքնություն, ինչպես նաև դատահոգեբուժական, դատաքիմիական, դատահետքաբանական, հողագիտական և դատաբժշկական փորձաքննություններ: