«Չնայած ղարաբաղյան խնդրի կարգավորման ուղղությամբ վերջին տարիներին գործադրված բազմաթիվ դիվանագիտական ջանքերին` հակամարտությունը շարունակում է բորբոքվել», – փաստում է ԱՄՆ-ում գործող հեղինակավոր Jane’s Intelligence հետազոտական կենտրոնի վերջին վերլուծությունը,- հաղորդում է «Ազատություն» ռ/կ-ն:
«Նավթից և բնական գազից ստացվող շահույթների հաշվին Ադրբեջանը փորձում է փոխել 17-ամյա ստատուս քվոն»,- ընդգծում է հեղինակավոր կենտրոնը` մանրամասնելով.- «Հենց այդ նպատակով պաշտոնական Բաքուն մտադիր է 2011 թվականին անվտանգության և ռազմական ոլորտին հատկացնել 3.1 միլիարդ դոլար, ինչը վեց անգամ գերազանցում է նույն ոլորտին Հայաստանի տրամադրած գումարի չափը»։
«Այդուամենայնիվ, չնայած Հայաստանի նկատմամբ Ադրբեջանի զգալի ֆինանսական առավելությանը, ադրբեջանցի սպաների աշխատավարձի առավելությունը հայ գործընկերների նկատմամբ չնչին է»,- փաստում է վերլուծությունը և ընդգծում.- «Ռազմական ոլորտում պաշտոնական Բաքվի կատարած ծախսերի մեծ մասը ուղղվում է անմխիթար վիճակում գտնվող ենթակառուցվածքների զարգացմանը և նոր ռազմատեխնիկայի ձեռքբերմանը»։
«Վերջին մի քանի տարիների ընթացքում Ադրբեջանում փամփուշտների ձեռքբերման նպատակով կատարված ծախսերը, ամենայն հավանականությամբ, գերազանցել են մեկ միլիարդ դոլարի սահմանը, և ակնկալվում է, որ մեծ միջոցներ կուղղվեն նաև ապագա գնումների համար»,- գրում է Jane’s Intelligence-ը։
Վերլուծելով կողմերի տնօրինած ռազմական հնարավորությունները` հետազոտական կենտրոնը փաստում է, որ զրահամեքենաների թվով երկու բանակներից որևէ մեկը մյուսի նկատմամբ էական առավելություն չունի:
«Կողմերի միջև լուրջ ռազմական բախումը, սակայն, ամենայն հավանականությամբ, առաջին հերթին կսկսվի օդային հարձակումներով և փոխադարձ հրետակոծությամբ, և հենց այս երկու ոլորտներում հայկական և ադրբեջանական բանակների միջև առկա տարբերությունն է, որ կարող է էապես փոխել նախնական վիճակը»,- կարծիք է հայտնում հեղինակավոր հետազոտական կենտրոնը։
Փաստելով, որ Ադրբեջանը առավելություն ունի Հայաստանի նկատմամբ թե՛ զինվորների թվաքանակի, թե՛ բյուջեի, թե՛ սպառազինությունների ավելացման տեսանկյունից, Jane’s-ը միաժամանակ ընդգծում է. «Այդուամենայնիվ, պարզ չէ` արդյոք պաշտոնական Բաքուն կկարողանա՞ այս քանակական առավելությունը վերածել որակականի և էականորեն փոխել իրավիճակը ռազմադաշտում»։
Այս հարցում, ըստ հեղինակավոր կենտրոնի վերլուծաբանների, Ադրբեջանի համար մարտահրավեր կարող է լինել Լեռնային Ղարաբաղի` ռազմական գործողությունների համար առավել բարենապաստ աշխարհագրական դիրքը, Ռուսաստանի հետ Հայաստանի կնքած ռազմական դաշինքը, ինչպես նաև քաղաքական իրավիճակը սեփական երկրի ներսում։
«Ռուսաստանի հետ կնքված դաշինքը Հայաստանի պաշտպանական համակարգի ամրապնդման հիմնական աղբյուրն է, որը հավելյալ ռիսկեր է ստեղծում Բաքվի համար. Մոսկվայի հետ գործակցության մեջ մտնելու կամ, դրան հակառակ, Թուրքիայի և Արևմուտքի հետ անվտանգության ոլորտում դաշինք կնքելու Ադրբեջանի փորձերը չեն կարող չեզոքացնել հակամարտության մեջ ներքաշվելու` Ռուսաստանի ներուժը»,- գրում է հետազոտական կենտրոնն ու կանխատեսում` հակամարտության սրման դեպքում Թուրքիան, Արևմուտքի նման, կփորձի խուսափել Ռուսաստանի հետ հակազդեցության մեջ մտնելուց ։
«Այս բոլոր հանգամանքները չեն բացառում Ղարաբաղի շուրջ ռազմական գործողությունների վերսկսման հնարավորությունը, այդուամենայնիվ, կողմերի ունեցած սահմանափակ հնարավորությունները և միջազգային համայնքի դիրքորոշումը խնդրի նկատմամբ սահմանափակում են իրադարձությունների զարգացման նման սցենարը»,- եզրափակում է Jane’s Intelligence-ը։
