ԱՄՆ մի քանի նահանգներում անսովոր շոգերի պատճառով մահացել է 30 մարդ:
Ինչպես հաղորդում է Associated Press-ը՝ վկայակոչելով տեղի իշխանություններին, զոհերի մեծ մասը տարեց մարդիկ են, որոնք մոտ 40 աստիճան շոգի պայմաններում սրտի նոպա են ունեցել: 10 մարդ մահացել է Մերիլենդում, երեքը՝ Օհայոյում, 10-ը՝ Իլինոյսում: Բժիշկները մահվան դեպքեր են գրանցել նաև Վիսկոնսինում, Թենեսիում, Փենսիլվանիայում:
Ուժեղ շոգերն ուղեկցվում են էլեկտրականության խաթարումներով, մասնավորապես, Վիրջինիա նահանգի արևմուտքում շուրջ 120 հազար մարդ արդեն մեկ շաբաթ մնացել են առանց էլեկտրականության, ևս 8 հազար մարդ նույն իրավիճակում են հայտնվել Բալթիմորի և Վաշինգտոնի արվարձաններում:
Զոհերի թվում հիմնականում այնպիսի մարդիկ են, ովքեր էլեկտրականության բացակայության պատճառով մնացել են տանը՝ ժամանակին բժշկական օգնություն չստանալով:
Տեղի էլեկտրացանցերի օպերատոր Pepco ընկերությունը սպառողներին խնդրել է տնտեսել էլեկտրաէներգիան, քանի որ շոգ եղանակին էլեկտրամատակարարման համակարգն աշխատում է ամենաբարձր հզորությամբ:
