Այսօր Եգիպտոսի ռազմական բարձրագույն խորհուրդը արտակարգ նիստից հետո հանդես է եկել հայտարարությամբ, որում նշել է, որ բանակը պատրաստվում է երաշխավորը լինել Եգիպտոսում տեղի ունեցող բարեփոխումների, որոնք կհանգեցնեն արտակարգ դրության վերացմանը և ժողովրդավարական ու արդար ընտրությունների անցկացմանը:
Արտակարգ դրությունը կվերացվի անմիջապես այն բանից հետո, երբ երկրում իրավիճակը կկայունանա,- ասված է նրանց հայտարարության մեջ: Այս հայտարարությունից կարելի է եզրակացնել, որ բանակը հիմնականում հետևեց երկրի նախագահի ուղերձին և գրեթե նույնությամբ կրկնեց նրա թեզերը:
Այս հայտարարությանը շատ էին սպասում Թահրիր հրապարակում, քանի որ բանակի դերակատարությունը երկրի ներքաղաքական զարգացումներում շատ կարևոր է: Հայտարարությունից պարզ չի դառնում, թե ինչպես կգործի բանակը, եթե այսօր ցուցարարները շարժվեն դեպի Հելիոպոլիս շրջանում գտնվող նախագահի նստավայրի կողմ: Արդյոք նրանք պատրաստվո՞ւմ են կանխել ընդդիմության բողոքի ակցիաները, թե՞ ոչ:
Մինչև հիմա բանակը, հատկապես հրապարակային հայտարարություններում, պահպանել է չեզոքություն` չնայած այն փաստին, որ որոշ իրավապաշտպան կազմակերպություններ, այդ թվում` Human Rights Watch-ը հայտարարել են, որ բանակն այս օրերին իրականացրել է հարյուրավոր մարդկանց ձերբակալություններ և խախտել նրանց իրավունքները` բռնություններ կիրառելով ձերբակալվածների դեմ: