Արհեստական արևայրուքը և առանց պաշտպանիչ միջոցների արևի տակ արևայրուք ստանալը վնասակար է մաշկի համար: Ինչպես «Առաջին լրատվական»-ին ասաց «Դա Վինչի» կլինիկայի բժիշկ-կոսմետոլոգ Նարինե Թումանյանը՝ առաջանում է ջրազրկում, որը հանգեցնում է վաղաժամ ծերացման և քաղցկեղի. «Վիճակագրությամբ երեքից չորս անգամ լավ արևայրուք ընդունելը՝ առանց պաշտպանվելու, արդեն վտանգավոր է, քանի որ մաշկի մեջ կարող են առաջանալ քաղցկեղային փոփոխություններ: Սակայն գրագետ արվելու դեպքում հաճախականությունը կապ չունի, ուղղակի պիտի օգտագործել ճիշտ քսուքներ»: Բժշկի հավաստմամբ՝ քսուքների ընտրության հարցում կարևորը գինը չէ, այլ այն, որ պատրաստված լինի բնական հումքից:
«Դետոքս» առողջության վերականգնման և պահպանման կենտրոնի բժիշկ-կոսմետոլոգ Մանե Բադալյանն էլ հավելեց, որ սոլյարիները վտանգավոր են հատկապես այն դեպքերում, երբ պաշտպանված չեն տեխնոլոգիաները, հնացած են սոլյարիների լամպերը և այլն: «Առաջին լրատվական»-ի հետ զրույցում նա ասաց, որ մի շարք դեպքերում նույնիսկ արգելված է սոլյարի անել: Մաշկային խրոնիկ հիվանդությունների, հղիության դեպքում շատ վտանգավոր է արհեստականորեն մգեցնել մաշկը, ինչպես նաև այն վտանգավոր է խալեր ունեցող մարդկանց համար. « Իմ բոլոր հաճախորդներին խորհուրդ չեմ տալիս օգտվել սոլյարիներից՝ հաշվի առնելով նրա վնասակարությունն ու այն հանգամանքը, որ մենք բարձրադիր գոտում ենք ապրում: Մեզ մոտ արևն առանց այդ էլ ակտիվ է՝ հատկապես գարնանն ու ամռանը, լրացուցիչ արհեստական ճառագայթվելու կարիք չկա»:
Արևի ուլտրամանուշակագույն ճառագայթներից զերծ մնալու համար բժիշկը խորհուրդ է տալիս արևի տակ չմնալ առավոտյան 12-ից մինչև երեկոյան 5-ը, քանի որ այս ժամանակ արևի ճառագայթներն ամենակարճ ճանապարհով են հասնում երկիր, որի հետևանքով դրանց վնասները շատ ավելի մեծ են:
Նշենք նաև, որ բնական ճանապարհով արևայրուք ստանալու դեպքում ուլտրամանուշակագույն ճառագայթները ցրված են, և մաշկը կարողանում է քիչ քանակությամբ ընդունել դրանք, իսկ սոլյարիի խցիկում դա անհնար է:
