««Օրինաց երկիր» կուսակցությանը շուտով քաղաքական հայտնի դեմքերի, որոնց հասարակությունը լավ ծանոթ է, նոր անդամագրումներ են սկսվելու»,- այսօր ԱԺ բրիֆինգների ժամին հայտարարեց Հեղինե Բիշարյանը և ավելացրեց, որ վերջին շրջանում 10 հազար քաղաքացիներ են անդամագրվել ՕԵԿ-ին:
ՕԵԿ-ական պատգամավոր Հովհաննես Մարգարյանը խոսեց օրենսդրական այն նախաձեռնությունների մասին, որ վերաբերում են Հողային օրենսգրքին և տեղական ինքնակառավարմանը:
Լրագրողների հարցին, թե ինչո՞ւ են նախօրոք հայտարարել Սերժ Սարգսյանի թեկնածությունը պաշտպանելու մասին, և արդյոք այդ քայլով չե՞ն դառնա Սերժ Սարգսյանի կցորդը, Հեղինե Բիշարյանը արձագանքեց, որ ցավ է ապրում նրանց համար, ովքեր իրենց նման պիտակ են կպցնում, և ՕԵԿ-ի համար պարզ է, թե ովքեր են դրա պատվիրատուները:
Բիշարյանը նշեց, որ իրենց կարծիքը այդ առումով հստակեցրել են, իսկ ովքեր չեն հստակեցրել` դա նրանց խնդիրն է:
Հեղինե Բիշարյանի խոսքերով, ՕԵԿ-ը 14 տարվա քաղաքական ուժ է, և ցավ է ապրում, որ նման երազախաբություններ են տեղի ունենում:
Նա հստակեցրեց նաև, որ այսօր կոալիցիոն ուժերի նիստ է տեղի ունենալու, որտեղ հաստատվելու են կոալիցիոն գործընկերների առաջիկա քայլերը:
