Գազի գնի փոփոխության վերաբերյալ Հանրային ծառայությունները կարգավորող հանձնաժողովը որևէ հայտ առայժմ չի ստացել և որևէ տեղեկություն չունի: Այս մասին «Առաջին լրատվական»-ին հայտնեց ՀԾԿՀ լիցենզավորված գործունեության մոնիտորինգի և ներդրումային ծրագրերի վարչության պետ Աբգար Բուդաղյանը:
«Հանձնաժողովի տեսանկյունից ընկերության հաշվապահական վնասը կամ օգուտը դիտարկելի չեն: Մենք սակագին ենք հաշվում և սակագների հաշվարկման մակարդակում ենք դիտարկում ընկերության շահութաբերության մակարդակը: Թե իր հաշվապահական հաշվեկշռում նա ինչ վնասների և օգուտների է գալիս, դա իր խնդիրն է: Եթե ըներությունը գտնում է, որ իր ընթացիկ գործունեությունը չի կարող ապահովել գործող սակագնի մակարդակում, ապա ներկայացնում է սակագնի փոփոխման հայց և դրա հիմնավորումները: Այս պահի դրությամբ ընկերությունը հանձնաժողովին որևէ հայց չի ներկայացրել»,- նշեց Ա. Բուդաղյանը:
Հիշեցնենք, որ վերջին շրջանում էներգետիկայի և բնական պաշարների նախարար Արմեն Մովսիսյանը և «Գազպրոմի» ներկայացուցիչները բանակցություններ են վարում գազի գնագոյացման շուրջ: Մամուլում հայտնված տեղեկությունների համաձայն՝ այս տարվա հոկտեմբերի 1-ից բարձրացվելու է Հայաստանին մատակարարվող ռուսական գազի գինը՝ 1000 խմ-ը մինչև 280 ԱՄՆ դոլար, իսկ 2013-ի հունվարի 1-ից գազի գինը կդառնա 320 դոլար, ներկայիս 180 դոլարի փոխարեն:
