Այսօր Եգիպտոսի ընդդիմությունը պատրաստվում է փողոց դուրս բերել մինչև 20 միլիոն մարդու: Ցույցեր և բողոքի ակցիաներ տեղի կունենան Եգիպտոսի տարբեր քաղաքներում: Գիշերվա ընթացքում մի քանի հազար մարդ շրջապատել են պետական հեռուստատեսությունը, ինչպես նաև փակել են մուտքը դեպի երկրի խորհրդարան: Իսկ Մուբարաքի ելույթից հետո մի քանի հազար մարդ էլ գնացել են Կահիերում Մուբարաքի նստավայր և գիշերել այնտեղ:
Քիչ առաջ եգիպտացիները հեռախոսներին կարճ հաղորդագրություններ են ստացել, որից տեղեկացել են, որ զինվորական բարձրագույն ղեկավարությունը պատրաստվում է առաջիկա ժամերին կոչով դիմել ժողովրդին: Այս պահին նրանք արտակարգ նիստ են գումարել` քննարկելու համար երկրում ստեղծված իրավիճակը:
Հարկ է նշել, որ երեկ Մուբարաքի ելույթից հետո խոսել է նաև երկրի փոխնախագահ Օմար Սուլեյմանը, որը կոչ է արել տները վերադառնալ: Նա նաև ժողովրդին առաջարկել է միավորվել հանուն երկրի ապագայի։ «Երկխոսության դռները բաց են: Եկե՛ք խնդիրները լուծենք իրավական դաշտում: Ես կոչ եմ անում ձեզ գնալ տները և վերադառնալ նորմալ կյանքի ու աշխատանքի»,- ասել է Սուլեյմանը:
Թերևս, իշխանությունների համար էլ պարզ է, որ երկարատև ցույցերի դեպքում նույնիսկ բռնատիրական մեթոդներով հնարավոր չի լինի ապահովել երկրի բնականոն գործունեությունը, քանի որ մի բան է պայքարել մեկ կազմակերպության դեմ, մեկ ուրիշ բան` տասնյակ միլիոնների: