ՀՀ Քրեական օրենսգրքի 104 հոդվածի առաջին մասի հատկանիշներով (սպանություն, ապօրինի` մեկ ուրիշին կյանքից զրկել) գործ է հարուցվել Վանաձոր քաղաքի բնակիչ Գևորգ Միրաքյանի (մականունը Գիվի) նկատմամբ:
Վերջինս մեղադրվում է Վանաձորի բնակիչ, 70-ամյա Միշա Կիրակոսյանի (մականունը՝ Մշկո) սպանության մեջ: Վերջինիս դիակը` բռնության հետքերով, հայտնաբերվել է փետրվարի 10-ի առավոտյան քաղաքի Տիգրան Մեծ փողոցի 54/2 շենքի բակում:
Լոռու մարզի քննչական բաժանմունքի պետ Գագիկ Իսպիրյանը լրագրողներին տեղեկացրել է, որ ամեն ինչ արվում է սպանության հանգամանքները պարզելու համար: Նախնական վարկածով, սպանության դրդապատճառը կենացաղային է եղել:
«Մշկոն ու Գիվին վերջինիս տանը կազմակերպված ճաշկերույթի ժամանակ խմել են, վիճաբանել, որից հետո Գիվին ծանր մարմնական վնասվածքներ պատճառելու դիտավորությամբ մի քանի անգամ Կիրակոսյանի ձեռնափայտով ու բութ առարկայով հարվածել է ծերունու գլխին` սպանելով նրան». ասում են իրավապահները:
Դեռ պարզ չէ, թե ինչպես է դիակը հայտնվել շենքի բակում: Նշենք, որ Գևորգ Միրաքյանը 11 անգամ դատապարտված է եղել:
