«Ժառանգություն» կուսակցության փոխնախագահ Ռուբեն Հակոբյանը մամուլի ասուլիսի ժամանակ կարծիք հայտնեց, որ «Մեդիամաքս» գործակալությունը դարձել է հայկական WikiLeaks, քանի որ զբաղված է բացահայտումներ անելով:
ՀՀԿ-ԲՀԿ հակամարտության մեջ Ռուբեն Հակոբյանը չի տեսնում քաղաքական տարր, այլ հարցը դիտարկում է բարոյական հարթությունում:
Ըստ Ռուբեն Հակոբյանի` բարոյականությունը քաղաքական կատեգորիա չէ:
Ռոբերտ Քոչարյանի ասածները նա համարում է բացարձակ ճշմարտություն, քանի որ Հանրապետական կուսակցության ցուցակը կազմվել է նրա գիտությամբ: Նա ասաց, որ Ռոբերտ Քոչարյանը մասնակցել է նաև «Բարգավաճ Հայաստան» կուսակցության ձևավորմանը:
Ռուբեն Հակոբյանը կանխատեսեց, որ եթե այսպես շարունակվի, «Մեդիամաքս»-ը կարող է բացահայտել, որ Սերժ Սարգսյանին նախագահ է դարձրել Ռոբերտ Քոչարյանը: Ռուբեն Հակոբյանը կարծիք հայտնեց, թե Ռոբերտ Քոչարյանը չէր նախատեսել, որ կարող է լինել Մարտի 1: Նրա կարծիքով, Հայաստանում իշխանափոխությունից հետո պետք է գործեր ռուսական մոդելը:
«Ժառանգության» փոխնախագահը հիշեցրեց, որ ՌԴ-ում Դ. Մեդվեդևը քվեարկվեց որպես նախագահ, նախկին նախագահը դարձավ գլխավոր դերակատարներից մեկը: Ռուբեն Հակոբյանը բացատրեց, թե ինչու Հայաստանում այդ մոդելը չաշխատեց: Այդ հանգամանքը նա կապում է այն բանի հետ, որ, նախ, Վ. Պուտինը անառարկելի հեղինակություն է ռուսական քաղաքական էլիտայում, և երկրորդ՝ Ռուսաստանում տեղի չունեցավ Մարտի 1:
Ռուբեն Հակոբյանը հիշեցրեց, որ Շուշին գրավելիս մենք նույնքան զոհ տվեցինք, որքան Մարտի 1-ին:
