Հայաստան-Վրաստան համագործակցության շրջանակներում սահմանների համալիր կառավարումը հենվում է 3 հենասյուների վրա, որոնցից առաջինը ենթադրում է ներգերատեսչական համագործակցություն, որ բոլոր գերատեսչությունների ներսում գործընկերները տեղյակ լինեն, թե իրենց գործընկերներն ինչով են զբաղվում, երկրորդ՝ միջգերատեսչական համագործակցություն, որպեսզի սահմանի վրա ներկայացված 5 գերատեսչությունները՝ ԱԱԾ-ն, սահմանապահ զորքերը, ոստիկանությունը, Սննդի անվտանգության պետական ծառայությունը և առողջապահության նախարարությունը, կարողանան համագործակցել, և երրորդ՝ միջսահմանային համագործակցություն, որպեսզի ընթացակարգերը լինեն համակարգված:
Ինչպես «Առաջին լրատվական»-ի հետ զրույցում հայտնեց ԵՄ Հարավային Կովկասում Սահմանների համալիր կառավարման ծրագրի ղեկավար Գրիգոր Մալինցյանը, երբ ՀՀ և Վրաստանի միջև ընդունվեն իրավական փաստաթղթերը և համագործակցությունը հիմնված լինի այն պատկերացման վրա, որ համագործակցության արդյունքում կիրառվելու է մեկ պատուհան, մեկ կանգառ սկզբունքը, որ մարդը կարողանա սահմանը հեշտությամբ հատել, ու ոչ միայն մարդը, այլև տրանսպորտային միջոցները, այդ դեպքում նաև ապրանքաշրջանառությունը կկարգավորվի, բնականաբար, դա կունենա իր դրական ազդեցությունը տնտեսության վրա:
Գ. Մալինցյանը հայտնեց, որ անցած տարի ՀՀ և Վրաստանի միջև նախագծվել է մի փաստաթուղթ՝ «Սահմանային անցակետերի համատեղ օգտագործման վերաբերյալ» հուշագիր, որը դեռևս չի ընդունվել, բայց կառավարությունը որոշել է ստեղծել միջգերատեսչական աշխատանքային խումբ, որը կմշակի ծրագրերը, որոնք հուշագրի սահմաններում կկատարվեն: Ենթադրվում է, որ ծրագրերի մշակումը մինչև 2012-ի վերջ կկատարվեն: Նա հայտնեց, որ վերջերս Վրաստանում հանդիպում եղավ վրացական ՊԵԿ ներկայացուցչի հետ, ով նշել էր, որ հարաբերությունները ուզում են դարձնել ավելի կանխատեսելի, արագ ու արդյունավետ, և հայցել են իրենց աջակցությունը, որ ՀՀ ԱԳՆ-ն ավելի արագ ու արդյունավետ աշխատի Վրաստանի ԱԳՆ-ի հետ, քանի որ արտաքին գերատեսչությունները պետք է աշխատեն և ուղի հարթեն մյուս գերատեսչությունների համագործակցության համար: «Այդ կապակցությամբ մի քիչ անհանգստություն հնչեց, որ ԱԳՆ-ներն այնքան էլ հաջող չեն աշխատում»,- նշեց Մալինցյանը:
Վրաստանն անմիջապես պետական սահմանի Բավրա անցակետի մոտ իր կողմից պատրաստվում է նոր անցակետ գործարկել Թուրքիայի հետ: Նախկինում սահմանահատումները Վալեով էին կատարվում, որը 150 կմ հեռու է գտնվում ՀՀ սահմանից, իսկ նոր անցակետն ընդամենը 20 կմ հեռավորության վրա է: «Դա կնպաստի, որ ավելի քիչ ճանապարհ կանցնեն մեր բեռնափոխադրողները, բայց այնուամենայնիվ տարանցիկ են լինելու բեռնափոխադրումները: Քանի դեռ անմիջապես սահմանակետ չունենք Թուրքիայի հետ, շատ բան չի փոխվի տնտեսական համագործակցության առումով, և դրա մասին կարելի կլինի խոսել միայն ընդհանուր սահմանային անցակետ ունենալու դեպքում»,- ասաց ԵՄ փորձագետը:
