Այսօր ԱԺ հայտարարությունների օրակարգում խոսքի իրավունք խնդրեց 14 պատգամավոր:
ՀՅԴ խմբակցության պատգամավոր Արա Նռանյանը խոսեց վրացական պետհամարանիշերի մասին և նկատեց, որ այդ վարորդները երկու խմբի են պատկանում: Առաջինը այն վարորդներն են, որոնք ցանկանում են այդ կերպ զերծ մնալ մաքսային վճարումներից, իսկ երկրորդ խումբը սոցիալապես անապահով խավն է, որոնք մաքսային վճարներ կատարելու հնարավորություն չունենալու պատճառով այդ պետհամարանիշերն են օգտագործում, ապա նշեց, որ եթե այսօր այդ մարդիկ բողոքի գործողություններ են կատարում, դրա համար առաջին հերթին պետք է մեղադրել ոչ թե նրանց, այլ պետական պաշտոնյաներին, որ նրանց խնդրանքը հաշվի չեն առել։
«Ժառանգություն» խմբակցության պատգամավոր Արմեն Մարտիրոսյանը ևս անդրադարձավ այդ խնդրին և ընթերցեց Շիրակի մարզի բնակիչների բողոք-նամակը, որով կոչ էին անում կիրառել 2010 թվականի վերջին գործող օրենքը, իսկ մաքսային վճարները գանձել ոչ թե միանգամից, այլ ամսական 2000 դրամով։
Պետհամարանիշերի մասով բողոք ներկայացրեց նաև ԱԺ պատգամավոր Շիրակ Թորոսյանը։ Նա նկատեց, որ Մաքսային օրենսգրքով եթե Վրաստանի քաղաքացին հատում է Վրաստանի սահմանը, 15 օրը մեկ պետք է հատի սահմանը և վերադառնա. օրինակ` եթե ուսանողը 90 օրով է գալիս Հայաստան, ապա պետք է 15 օրը մեկ գնա ու գա, որ կացության կարգավիճակ ստանա։
«Ժառանգության» պատգամավոր Լարիսա Ալավերդյանը կոչ արեց, որ Սումգայիթի փետրվարյան դեպքերը ԱԺ-ն ճանաչի որպես ցեղասպանություն։ Անահիտ Բախշյանը խոսեց կոռուպցիայից, որին ՀՀԿ 20-ամյակին անդրադարձել էր նախագահ Սերժ Սարգսյանը։
Իսկ ՀՅԴ պատգամավոր Արծվիկ Մինասյանը խոսեց տեղական ինքնակառավարման մասին օրենքից։