Պայթյուն` Կոտայքի մարզում. կա մեկ զոհ (լուսանկարներ)

Այսօր, ժամը 19.30-ի սահմաններում Կոտայքի մարզի Եղվարդ քաղաքի երկաթգծի կայարանի հարևանությամբ գտնվող նախկին` նավթի վերամշակման չգործող արտադրամասում պայթյուն է տեղի ունեցել, ինչի հետևանքով 1 մարդ մահացել է: Այս մասին տեղեկացնում է News.armeniatv.com-ըէ հղում անելով ֆոտոլրագրող Գագիկ Շամշյանին։

Դեպքի վայրում հավաքվածները ֆոտոլրագրողին պատմել են, որ մահացածը նույն հիմնարկության պահակ 55-ամյա Ներսես Ղազարյանն էր: Այս պահին դեպքի վայր են ժամանել Ոստիկանության Նաիրիի բաժնի օպերատիվ խումբը՝ բաժնի պետի ժամանակավոր պաշտոնակատար Տիգրան Պետրոսյանի գլխավորությամբ:

Տեղում են նաև Արտակարգ իրավիճակների նախարարության Փրկարար ծառայության Կոտայքի մարզի փրկարար վարչության Նաիրիի հրշեջ փրկարարաները: Արդեն դեպքի վայր է ժամանել Ոստիկանության քննչական գլխավոր վարչության Կոտայքի մարզի քննչական բաժնի Նաիրիի քննչական բաժանմունքի քննչական խումբը:

Թե ինչն է եղել պայթյունի պատճառը, այս պահին փորձագետները չեն կարող ասել, քանի որ աշխատանքներ են կատարում պարզելու համար պայթյունի պատճառները:

Տեղում է նաև ՀՀ ԱԻՆ Փրկարար ծառայության Քաղպաշտպանության վարչության աշխատակիցները՝ վարչության պետ ՓԾ գնդապետ Մանվել Ներսիսյանի գլխավորությամբ:

Լուսանկարները` Գագիկ Շամշյանի