«Ռուսական երկաթուղային ճանապարհները» հետաքրքրություն է ցուցաբերում Բուլղարիայի ու Հունաստանի երկաթուղային ճանապարհների նկատմամբ լայնագիծ երկաթգծի կառուցման տրանսեվրասիական միջանցքի զարգացման շրջանակում: Ինչպես գրում է Interfax-ը, այս մասին Պետերբուրգի տնտեսական ֆորումի շրջանակում հայտարարել է «Ռուսական երկաթուղային ճանապարհների» փոխնախագահ Վալերի Ռեշետնիկովը:
«Մենք շատ բաների նկատմամբ ենք հետաքրքրություն դրսևորում, սակայն ամեն ինչ չի սեփականաշնորհվում»,- ասել է նա:
Ռեշետնիկովը հավելել է, որ Հունական երկաթուղային ճանապարհները «գտնվում են տնտեսապես լավ վիճակում» : Չի նշվում` ինչ է նկատի ունեցել նա` ճանապարհների վիճակը, թե ընկերության ֆինանսական վիճակը:
2012թ. ապրիլին ԶԼՄ-ներն արդեն հայտնել էին, որ «Ռուսական երկաթուղային ճանապարհները» մտադիր է ձեռք բերել Բուլղարիայի երկաթուղային ճանապարհները` Freight Transport-ը, որը պետք է սեփականաշնորհվի մեկ տարվա ընթացքում, սակայն այս տեղեկությունը հերքվել էր բուլղարական կողմից:
2009թ. մայիսին Ռուսաստանի, Ուկրաինայի, Սլովակիայի ու Ավստրիայի երկաթուղային ընկերությունները ստորագրեցին համաձայնագիր` կառուցել լայնագիծ երկաթգիծ Արևելյան Եվրոպայի Կոշնիր քաղաքից մինչև Վիեննա: Երկաթգիծը պետք է ունենա 450 կմ: Նախագծում ներդրումները գնահատվում են 6.25 մլն եվրո: Բացի այդ` կողմերը մտադիր են ներդնել 240 մլն եվրո տերմինալների զարգացման մեջ ու ևս 130 մլն եվրո` շարժակազմի մեջ:
Ենթադրվում է, որ նոր երկաթուղային ճանապարհները թույլ կտան բեռների տեղափոխումը Ասիայից Եվրոպա ու հակառակ ուղղությամբ կրճատել 15 օրով:
