«Բատկիվշչինա» կուսակցության պատգամավոր Սերգեյ Վլասենկոն, ով համարվում է Ուկրաինայի նախկին վարչապետ Յուլյա Տիմոշենկոյի պաշտպանը, համարում է, որ վերջինիս ձեռնտու չէր դոնեցկյան գործարար ու Ռադայի պատգամավոր Եվգենի Շչերբանի սպանությունը: Այս մասին հայտնում է «Կոմերսանտ-Ուկրաինան»:
«Որքան ես հիշում եմ իրավիճակը սկսած 1995-ից, Ուկրաինայի միասնական էներգետիկ համակարգը կապալառու ուներ Դոնեցկի մարզում, որի միջոցով էր վաճառվում գազը` «Դոնբասի արտադրական միություն», ու մատակարարումների հետ կապված ոչ մի հարց չի ծագել»։ Ինչ վերաբերում է Շչերբանին, ապա հարց տվեք ինքներդ ձեզ` ո՞վ օգուտ քաղեց նրա մահից»,- դատողություն է անում Վլասենկոն:
«Սկսենք քաղաքական օգուտներից: Այդ իրադարձության ականատեսներն ինձ պատմել են, որ Եվգենի Շչերբանի դագաղի վերևում կանգնած էր Եվգենի Մարչուկը, որին Շչերբանը տեսնում էր երկրի նախագահի պաշտոնում: Մարչուկին, հիշեցնեմ, Կուչման հրամայել էր հեռացնել վարչապետի պաշտոնից` հատկանշական ձևակերպմամբ` «հանուն քաղաքական իմիջի»: Քաղաքական իրավիճակը Դոնեցկի շրջանում Շչերբանին ձեռնտու էր ամբողջությամբ, նա մեծ ազդեցություն ուներ այն ժամանակվա նահանգապետի վրա, որին հանեցին սպանությունից 4 ամիս անց: Նրա տեղում նշանակվեց Յանուկովիչը»,- հիշեցրել է պաշտպանը:
«Եթե Շչերբանը ողջ լիներ, ապա, իմ խորին համոզմամբ, Յանուկովիչին չէին նշանակի նահանգապետ»,- ենթադրություններ է արել նա:
Հիշեցնենք, որ Ուկրաինայի ժողովրդական պատգամավոր Եվգենի Շչերբանի որդին` Ռուսլան Շչերբանը, երկրի գլխավոր դատախազությանն է ներկայացրել Յուլյա Տիմոշենկոյի ու Պավել Լազարենկոյի` հոր սպանությանը հնարավոր մասնակցության վերաբերյալ փաստաթղթեր: Եվգենի Շչերբանին և նրա կնոջը գնդակահարել էին 1996 թ. նոյեմբերի 3-ին՝ Դոնեցկի օդանավակայանում:
