3 օրից Ստեփանակերտի օդանավակայանն իրավունք կստանա մտնել շահագործման մեջ: Այսօր «Առաջին լրատվական»-ի հետ զրույցում այս մասին ասաց ԼՂՀ քաղաքացիական ավիացիայի վարչության պետ Դմիտրի Ադբաշյանը` անդրադառնալով Ստեփանակերտի օդանավակայանի վերագործարկմանը:
Ադբաշյանը նշեց, որ օդանավակայանում յուրաքանչյուրը պետք է աշխատի արտոնագրված աշխատատեղում, արտոնագրված սարքավորումների վրա, ուստի դեռևս շարունակվում են արտոնագրման աշխատանքները: Ըստ նրա` Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչության պետ Արտյոմ Մովսեսյանի գլխավորած պատվիրակությունը հիմա զբաղվում է արտոնագրման հարցերով, ստուգում են բոլոր ծառայությունները, ամեն մի մասնագետի հետ առանձին քննարկումներ են անցկացնում, հարցեր են տալիս, պատասխաններ են ստանում: «Եթե այս ամբողջ աշխատանքն ավարտվի, ամբողջ օդանավակայանը կհամարվի սերտիֆիկացված»,- ասաց Ադբաշյանը: ԼՂՀ քաղաքացիական ավիացիայի վարչության պետը հույս հայտնեց, որ այս ամիս այդ աշխատանքները կավարտվեն և օդանավակայանը պատրաստ կլինի գործարկման: Ադբաշյանի կարծիքով` 2-3 օրից օդանավակայանը պատրաստ կլինի շահագործման:
Հիշեցնենք, որ Արցախի Հանրապետության Նախագահ Բակո Սահակյանը հունիսի 18-ին ընդունել էր Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչության պետ Արտյոմ Մովսեսյանի գլխավորած պատվիրակությանը:
Հանդիպման ընթացքում քննարկվել էին Ստեփանակերտի օդանավակայանի վերագործարկման, ինչպես նաև մեր հանրապետությունում քաղաքացիական ավիացիայի զարգացմանը վերաբերող հարցեր: Հատուկ ուշադրություն էր դարձվել այս ոլորտում երկու հայկական պետությունների համապատասխան գերատեսչությունների միջև համագործակցության հեռանկարներին:
Հանդիպմանը մասնակցել են վարչապետ Արա Հարությունյանը, պաշտոնատար այլ անձինք:
