Եվրամիությունը լրացուցիչ 40 միլիոն եվրո է տրամադրել, որպես մարդասիրական օգնություն, աֆրիկյան Սախելի բնակիչներին, որոնց սպառնում է պարենային ճգնաժամը: Այս մասին, ինչպես հաղորդում է Itar-Tass-ն, այսօր բելգիական մայրաքաղաքում հայտարարել է միջազգային համագործակցության, մարդասիրական օգնության և ճգնաժամային արձագանքման հարցերով եվրահանձնակատար Կրիստալինա Գեորգիևնան:
Միջոցներն ուղղվում են սովի դեմ պայքարելու համար, որին ենթարկվում է 18 միլիոն մարդ Սախելի տարածքում` Սահարա անապատի մոտ գտնվող երկրներում: Գեորգիևնայի խոսքերով՝ «ժամանակը քիչ է, քանի որ մի քանի օր հետո ճգնաժամը կհասնի իր գագաթնակետին»: «Խոսքը վերաբերում է կյանքեր փրկելուն: Բնակչության պարենի պաշարները սպառվում են»,-հստակեցրել է եվրահանձնակատարը:
2012 թվականի սկզբից ի վեր Եվրահանձնաժողովը, կապված իրավիճակի կտրուկ վատթարացման հետ, մեծացրել է Սախելի երկրների ֆինանսական աջակցության ծավալները` 45-ից հասցնելով ավելի քան 280 միլիոն եվրոյի։ Այս իրավիճակը պայմանավորված է երաշտի խորացման, պարենային դժվարությունների և ահաբեկչական խմբավորումների ակտիվությամբ:
