Այսօր Եգիպտոսում սկսվել է նախագահական ընտրությունների երկրորդ` վճռորոշ քվեարկությունը:
Երևանի ժամանակով ժ. 10.00-ին Եգիպտոսում բացվել են 13 հազար ընտրատեղամասերը, ու սկսվել է քվեարկությունը, որը շարունակվելու է մինչ ժ. 22.00-ն:
Ընտրողների բարձր ակտիվության դեպքում տեղամասերի աշխատանքը կարող է շարունակվել նաեւ ուշ ժամերին:
Քվեարկության ժամանակ կարգուկանոնը կհսկեն 150 հազար զինծառայողներ, ինչպես նաև ոստիկանական ուժերը:
Ընտրություններին մասնակցելու է մոտ 50 մլն ընտրող: Նրանք պետք է ընտրություն կատարեն երկու թեկնածուների` «Մուսուլման եղբայրներ» իսլամիստական կուսակցության ղեկավար Մուհամմեդ Մուրսիի ու գեներալ, ռազմական օդաչու, Եգիպտոսի նախկին նախագահ Հոսնի Մուբարաքի կառավարման տարիներին վարչապետ եղած Ահմեդ Շաֆիկի միջև:
Հենց նրանք են դուրս եկել նախագահական ընտրությունների երկրորդ փուլ` ձայների ընդամենը 200 հազար տարբերությամբ: Ընտրությունների առաջին փուլում Մուրսիի օգտին քվեարկել է 5 մլն 726 հազար ընտրող (24.7 տոկոս), Շաֆիկի` 5.5 մլն (23.6 տոկոս):
