Թուրքական Dünya Bülteni կայքի փոխանցմամբ՝ Türk Telekom Arena-յում թուրքական 10-րդ օլիմպիադայի փակման արարողակարգին մասնակցող Թուրքիայի վարչապետ Ռեջեփ Թայիփ Էրդողանը երկար տարիներ ԱՄՆ-ում բնակվող Ֆեթհուլլահ Գյուլենին կոչ է արել վերադառնալ Թուրքիա։
«Արտասահմանում բնակվելն առաջացնում է կարոտ, ինչին շատ դժվար է դիմանալ: Մենք ցանկանում ենք մեր շարքերում տեսնել նրանց, ովքեր ապրում են օտար հողում և կարոտում են հայրենիքին: Այդ ամենին կարելի է վերջ դնել: Ձեր ներկայիս վիճակը ցույց է տալիս, որ դուք, ինչպես և մյուս բոլորը, ցանկանում եք վերջ դնել կարոտին: Ես հասկանում եմ դա և ողջունում եմ այդ ցանկությունը»,-ասել է նա։
Հիշեցնենք, որ թուրք մտածող Ֆեթհուլլահ Գյուլենն իսլամի մասին հեղինակել է ավելի քան 60 գիրք՝ հիմք դնելով գյուլենական շարժմանը և մեծ ազդեցություն ունենալով Թուրքիայի ներկայիս վարչապետ Ռեջեփ Թայիփ Էրդողանի իսլամական հայացքների վրա: Գյուլենական շարժումը Թուրքիայում և արտասահմանում, մասնավորապես Միջին Ասիայում ունի միլիոնավոր հետևորդներ:
1998 թվականին (1997 թվականի հետմոդեռնիստական հեղաշրջումից հետո) Գյուլենը մեղադրվել է գործող կարգը տապալելու փորձի համար և նույն տարի հեռացել է ԱՄՆ: 2006 թ. մայիսին (Էրդողանի գլխավորած «Արդարություն ու զարգացում» կուսակցության կառավարման ժամանակաշրջանում) Թուրքիայում վերացվեցին Գյուլենի հասցեին հնչեցված բոլոր մեղադրանքները:
2008 թվականին ամերիկյան Foreign Policy պարբերականի ընթերցողները Ֆեթհուլլահ Գյուլենին ճանաչեցին որպես աշխարհի առաջադեմ ինտելեկտուալ: WikiLeaks-ի կողմից հրապարակվող Stratfor-ի նամակագրությունում (2011 թվական) նշված էր Գյուլենական շարժման և Թուրքիայի իշխող «Արդարություն ու զարգացում» կուսակցության (Գյուլեն-Էրդողան) առճակատման մասին:
