Սյունիքի մարզկենտրոնի բնակիչների համար փետրվարի 6-ի կիրակին «սատանայական» էր: Թերևս ուժեղ քամու պատճառով հաճախակի հոսանքազրկվում էր քաղաքի մի մասը: Հետո, երբ լույսն էր լինում, գազն էր անջատվում անհասկանալի պատճառներով: Դրան գումարած՝ չնայած «Հայջրմուղկոյուղու» հարավային մասնաճյուղի «Կապան» տեղամասի պատասխանատուների հավաստիացումներին, այդպես էլ չհաջողվեց Գեղիի ջրատարից սնվող թաղամասերին ջուր մատակարարել:
Հիշեցնենք, որ մեկ ամիս է՝ անկանոն է դարձել Կապանի ջրամատակարարումը, ինչը պատճառաբանվում է տեղումների պակասով: «Հայէլցանցերի» «Տաթև» մասնաճյուղում էլ պարզաբանեցին, որ սպառողները սկսել են գազի փոխարեն ավելի շատ էլեկտրաէներգիա օգտագործել: Արդյունքում՝ քաղաքի որոշ ենթակայաններում բարձրանում է լարումն ու հանգեցնում վթարի:
Ի դեպ, շաբաթներ առաջ «ՀայՌուսգազարդի» Սյունիքի ԳԳՄ տնօրեն Արթուր Խաչատրյանը «Առաջին լրատվական»-ի թղթակցի հետ զրույցում ասել էր, որ գազի օգտագործման ծավալները պակասել են, բայց դա պայմանավորեց տաք եղանակներով: «Ոչ մի սպառող գնի պատճառով չի հրաժարվել գազից»,- ասել էր Ա. Խաչատրյանը: Կարծես ամեն մեկը յուրովի արդարացում է գտնում: Իսկ սպառողն ինչո՞վ է մեղավոր, արդյո՞ք հնարավոր չէ նորոգել ենթակայանները, փոխել մալուխները:
