Սիրիայի հարցում Մոսկվայի հետ ունեցած տարաձայնությունները չեն խանգարում, որպեսզի ԱՄՆ-ը պաշտպանի Ռուսաստանի ամդամակցությունը Առևտրի համաշխարհային կազմակերպությանը (ԱՀԿ): Այս մասին ինչպես հաղորդում է ABC News-ը, հայտարարել է Սպիտակ տան պաշտոնական ներկայացուցիչ Ջեյ Քարնին:
«Մենք աջակցում ենք Ռուսաստանի անդամակցությանը ԱՀԿ-ին, ինչպեսև բոլոր միջոցառումներին, որոնք անհրաժեշտ են ձեռնարկել դրա համար: Այո, մենք տարաձայնություններ ունենք ռուսների հետ, այդ թվում և Սիրիան, բայց դա չի նշանակում, որ մենք չենք կարող համագործակցել այն ոլորտներում, որտեղ մենք ունենք ընդհանուր դիրքորոշումներ»,- ասել է Քարնին:
Նրա խոսքով՝ Վաշինգտոնն ամեն ինչ անում է, որպեսզի փորձի հաղթահարել Սիրիայի հարցում Մոսկվայի հետ ունեցած տարաձայնությունները:
Պատասխանելով լրագրողների այն հարցին, թե ինչու ԱՄՆ-ը Սիրիայի հարցում դիրքորոշման փոփոխությունը պայման չի դնում ԱՀԿ-ին անդամակցության համար, Քարնին ասել է. «Դուք առաջարկում եք մի կապ, որը լուծման չի հանգեցնի: Ես կարծում եմ, որ այդ հարցը պետք է լուծել միայն ուղղակի և բաց քննարկումների ճանապարհով»:
Վաշինգտոնը և Մոսկվան վերջին օրերին փոխադարձաբար միմյանց մեղադրում են Սիրիայում հակամարտության տարբեր կողմերին սպառազինություն մատակարարելու համար:
