Ինչպես հայտնում է France Presse գործակալությունը, Եգիպտոսի իշխանությունները և ընդդիմությունը համաձայնության են եկել սահմանադրական բարեփոխումների կոմիտե ստեղծելու վերաբերյալ: Այս մասին հայտնել է իշխանությունների ներկայացուցիչ Մագդի Ռադին: Նրա խոսքերով, կոմիտեի մեջ կմտնեն քաղաքական գործիչներ և իրավաբաններ, որոնք մինչև մարտի սկիզբ կքննարկեն և կնախապատրաստեն սահմանադրական բարեփոխումների փաթեթ:
Հայտնի է, որ իշխանություններին այդ բանակցությունների ժամանակ ներկայացնում է փոխնախագահ Օմար Սուլեյմանը: Ընդդիմության կողմից բանակցություններին ներկյացաված են եղել մի քանի ազդեցիկ կազմակերպություններ, այդ թվում` «Մուսուլման եղբայրները»: France24 հեռուստաընկերության փոխանցմամբ` այդ բանակցություններին ներկա են եղել նաև«Ալ-Վաֆդ» կուսակցության ղեկավար Սայիդ Ալ-Բադաուին և միավորված ընդդիմության առաջնորդ Մուհամադ Ալ-Բարադեին: Բացի այդ, բանակցություններին ներկա են եղել նաև Եգիպտոսում հայտնի անհատներ, այդ թվում` միլիարդատեր Նագիբ Սավիրսը:
Բանակցություններից հետո Օմար Սուլեյմանն ասել է, որ ընդդիմությունը համաձայնել է թույլ տալ Մուբարաքին աշխատել մինչև իր լիազորությունների ժամկետի վերջը: Սակայն ընդդիմության ներկայացուցիչները դա հերքել են: Շատերն այս հանդիումը համարում են ամերիկյան բանագնաց Ֆրենկ Ուիսների գործունեության արդյունք, որը հանդիպումներ է ունեցել քաղաքական բոլոր ուժերի հետ:
