Երեկ ՀՀ վարչապետ Տիգրան Սարգսյանի նախաձեռնությամբ անկախ պատգամավորներ Էդմոն Մարուքյանը և Արայիկ Գրիգորյանը հանդիպել են վարչապետի հետ: ՀՀ նորընտիր վարչապետն անկախ պատգամավորներին է ներկայացրել ՀՀ նոր կառավարության ռազմավարական ուղղությունները, քննարկել դրանք նրանց հետ և լսել նրանց առաջարկները:
«Առաջին լրատվական»-ի հետ զրույցում Վանաձոր քաղաքից 5-րդ գումարման խորհրդարանի պատգամավոր ընտրված անկուսակցական Էդմոն Մարուքյանն ասաց, որ ինքը գոհ է հանդիպման ընթացքից: Նա նկատեց, որ Տիգրան Սարգսյանի հետ առաջին անգամ էր հանդիպում և լավ տպավորություն ստացավ: Անկախ պատգամավորի խոսքերով` ինքը կարողացել է բարձրացնել մի շարք խնդիրներ՝ կապված և՛ վանաձորցիների, և՛ այլ հարցերի հետ: Ըստ նրա` առաջարկները քննարկվել և դրական արձագանք են ստացել: Հարցին, թե ի՞նչ հարցեր են բարձրացվել իր կողմից, Մարուքյանը պատասխանեց, որ առաջարկները մի քանիսն են եղել:
«Վանաձոր համայնքում կա տնակային «Լենինգրադյան» ավան, որտեղ մի քանի հարյուր ընտանիք բնակվում է շատ ծանր պայմաններում: Ես առաջարկեցի, որ այս մարդկանց բնակարանային խնդիրների վերաբերյալ կառավարությունը ինչ–որ ծրագիր մշակի առաջիկայում: Նաև դիմել եմ երիտասարդ գիտնականների ֆինանսավորման պահանջի հարցով: Ես ևս պնդեցի, որ գիտության ֆինանսավորումը պետք է ավելացվի։ Երիտասարդ գիտնականների՝ երկրում իրացվելու հնարավորության հարցը ևս բարձրացրեցի: Վարչապետը խոստացավ, որ գիտության ֆինանսավորման ավելացման ուղղությամբ թեմատիկ ոլորտում գումարի տրամադրման հարցը կքննարկվի»,- մանրամասնեց Էդմոն Մարուքյանը` հավելելով, որ այս ուղղությամբ կոնկրետ աշխատանքներ պետք է արվեն, որովհետև գիտության ֆինանսավորումը չպետք է լինի ինքնանպատակ, պետք է այն ունենա հստակ նպատակներ, որոնց լուծման արդյունքում կունենանք «պրոդուկտ»:
Էդմոն Մարուքյանի կարծիքով` դրական էին կառավարության նոր ծրագրում ընդգրկված սոցիալական մի քանի ուղղություններ: Նա նշեց, որ ուրախալի է այն հանգամանքը, որ կառավարությունը նախատեսում է աղքատ ընտանիքներին՝ երիտասարդների բուհ ընդունելության դեպքում պետության կողմից վճարն ապահովել:«Ամերիկյան մոտեցման նման մի բան է ստացվում, երբ մարդուն կրթության համար կառավարությունը գումար է տալիս, որը դառնում է ներդրում մարդու հետագա կյանքի համար: Սակայն ծրագիրը վերջնական տեսքով կհասնի պատգամավորներին և իմ վերջնական դիրքորոշումը կհայտնեմ կառավարության ծրագրին ամբողջությամբ ծանոթանալուց հետո»,- նշեց Էդմոն Մարուքյանը:
Նրա համոզմամբ` ժամանակը ցույց կտա, թե կառավարությունն իսկապես պատրաստակա՞մ է, թե՞ ոչ: «Բյուջեի քննարկումների ժամանակ պարզ կդառնա: Իմ առաջարկություններն եմ անելու, դրանից կերևա, թե կառավարությունը քանի առաջարկություն կընդունի կամ չի ընդունի: Համենայնդեպս, համագործակցությունը չի լինում միակողմանի»,- եզրափակեց իր խոսքը Էդմոն Մարուքյանը:
