Ռասիզմ… «մարդկային» դրսևորման ամենատգեղ և ամենաանընդունելի ձևերից մեկը վերջին ժամանակներում կայծակնային արագությամբ տարածվեց եվրոպական ֆուտբոլային խաղադաշտերում: Աբսուրդի հասնող պահվածքի ալիքը հասավ նաև Ռուսաստան. տրիբունայից բանաններ նետվեցին Մախաչկալայի «Անժի»-ի ֆուտբոլիստներ Ռոբերտո Կառլոսի և Քրիստոֆեր Սամբայի ուղղությամբ: Շուտով ռասիզմը տարածվեց նաև ուկրաինական մարզադաշտերում` միգուցե Ռուսաստանում նման ոճրագործներին համապատասխան պատժի չարժանացնելու պատճառով:
«Այն երկրները, որոնք չեն կարողանում պայքարել ռասիզմի դեմ, խոշոր մրցաշարեր ընդունելու իրավունք չունեն: Ավելի լավ է մնալ տանը և «Եվրո-2012»-ի խաղերը դիտել հեռուստացույցով: Ինչո՞ւ ռիսկի դիմել»,- հեռուստահաղորդումներից մեկի ժամանակ երկրպագուներին նման կոչ արեց Անգլիայի ազգային հավաքականի նախկին պաշտպան Սոլ Քեմփբելը` իր հայրենակիցներին խորհուրդ տալով չմասնակցել ֆուտբոլի Եվրոպայի 2012 թվականի առաջնությանը:
Սակայն անգլիացիները նույնպես զերծ չեն ռասիզմից: Առաջին դրսևորումը տեղի ունեցավ դեռ 1930 թվականին` «Էվերթոն»-ի հրաշալի ֆուտբոլիստ Դիքսի Դինի նկատմամբ (399 խաղում 349 գոլ): Դինը վստահեցնում էր, որ միջադեպը տեղի է ունեցել երկու սպիտակամորթ ոստիկանների աչքի առջև, սակայն նրանք պատասխանել են. «Դու ստացար այն, ինչին արժանի ես»:
Ռասիզմը, որը ներկայում իսկական պատուհաս է դարձել ֆուտբոլի համար, տրիբունաներից տեղափոխվեց նաև խաղադաշտեր. 2012թ. Canal+-ին տված հարցազրույցում «Մանչեսթեր Յունայթեդ»-ի ֆրանսիացի պաշտպան Պատրիս Էվրան հայտարարեց, որ «Լիվերպուլ»-ի ուրուգվայացի հարձակվող Լուիս Սուարեսը խաղի ժամանակ 10 անգամ իրեն անվանել է «նեգր»: Հանդիպման տեսագրությունը դիտելուց հետո Անգլիայի ֆուտբոլի ֆեդերացիայի կարգապահական կոմիտեն հարձակվողին որակազրկեց 8 խաղով:
«Եվրո-2012»-ի ժամանակ, բարեբախտաբար, լուրջ միջադեպեր դեռ չեն գրանցվել` բացառությամբ այն դեպքի, երբ Իտալիայի ազգային հավաքականի և բրիտանական «Մանչեսթեր Սիթի» ակումբի սևամորթ հարձակվող Մարիո Բալոտելիի հասցեին Իտալիա-Իսպանիա հանդիպման ընթացքում ռասիստական բնույթի վիրավորանքներ հնչեցին: Իսպանիայի ընտրանու ֆանատները վիրավորում էին 21-ամյա ֆուտբոլիստին` ամեն անգամ արձակելով տարբեր ձայներ, երբ Բալոտելին ստանում էր գնդակը:
Անընդունելի է նման պահվածքը մի ռասայի նկատմամբ, որը բազմաթիվ լեգենդներ է տվել աշխարհին սպորտում և դրա սահմաններից դուրս: Մեզ մնում է միայն հուսալ. հուսալ, որ ՖԻՖԱ-ն ու ՈւԵՖԱ-ն ավելի լուրջ պայքար կմղեն այս աղբը ֆուտբոլից դուրս բերելու ուղղությամբ: Անհրաժեշտ է խստացնել պատժամիջոցները տրիբունաներից անասնական ձայներ արձակող մարդակերպ «անասունների» նկատմամբ:
