«Ժառանգություն» կուսակցության նախկին պատգամավոր Արմեն Մարտիրոսյանը չի բացառում, որ ՀՀ նախկին արտգործնախարար Վարդան Օսկանյանին ԱԱԾ հարցաքննության հրավիրել են զուտ քաղաքական դրդապատճառներից ելնելով: Այս մասին նա ասաց «Առաջին լրատվական»-ի հետ զրույցում:
Արձագանքելով այն դիտարկմանը, որ ՀԱԿ համակարգող Լևոն Զուրաբյանը նշել է, թե ինքը չի զարմանա, եթե պարզվի, որ Օսկանյանի հետապնդումներն իրականացվում են քաղաքական հողի վրա, նախկին խորհրդարանականը նկատեց, որ ինքն այդ մասով առայժմ ձեռնպահ կմնա որևէ դիտարկում անելուց: «Ինքը՝ ՀԱԿ-ը պետք է հայտարարի՝ պաշտպանո՞ւմ է ՀՀ նախկին արտգործնախարարին, թե՝ ոչ: Դա շատ հեշտ է»,- ասաց Արմեն Մարտիրոսյանը՝ չպատասխանելով այն հարցին, թե հնարավո՞ր է, որ ՀԱԿ համակարգողի նմանօրինակ հայտարարությունը նշանակում է, որ ՀԱԿ-ը սատարում է Վարդան Օսկանյանին:
Նշենք, որ երեկ տարածված տեղեկության համաձայն՝ Վարդան Օսկանյանը կանչվել էր ԱԱԾ հարցաքննության՝ կապված իր կողմից հիմնադրված «Սիվիլիթաս» հիմնադրամում հայտնաբերված ֆինանսական խախտումների հետ:
Օսկանյանն իր հերթին հայտարարել էր, որ իր հանդեպ հետապնդումներ իրականացվում են քաղաքական դրդապատճառներով:
Այսօր Ազգային անվտանգության ծառայությունը հայտարարություն է տարածել, որով փորձ է արել ցույց տալ, որ հարուցված քրեական գործը քաղաքական պատվեր չէ:
Օսկանյանը ի պատասխան հայտարարել է. «Կրկնում եմ՝ դա միանշանակ քաղաքական պատվեր է և ուզում եմ ասել հետևյալը՝ «փողերի լվացում – Օսկանյան -Հանթսման» բառերը մեկ նախադասության մեջ չեն կարող լինել:
