«Ես բացառում են քաղաքական որևէ ենթատեքստ», – երեքշաբթի օրը ` «Ազատություն» ռադիոկայանի հետ զրույցում հայտարարել է Հայաստանի վարչապետ Տիգրան Սարգսյանը `գնահատելով Վարդան Օսկանյանի նախօրեին արած հայտարարությունը։
Երկուշաբթի օրը տարածած հայտարարությունում տեղեկացնելով, որ իրեն հրավիրել են Ազգային անվտանգության ծառայություն` որպես վկա ցուցմունքներ տալու հանցավոր ճանապարհով ստացված եկամուտներն օրինականացնելու հատկանիշներով հարուցված քրեական գործի շրջանակներում, և որ գործն առնչվում է իրեն և իր հիմնադրած «Սիվիլիթաս» հիմնադրամին, Ազգային ժողովի պատգամավոր, «Բարգավաճ Հայաստան» կուսակցության անդամ, Հայաստանի նախկին արտգործնախարար Վարդան Օսկանյանը կարծիք էր հայտնել, որ հարուցված քրեական գործի հետևում «ակնհայտ քաղաքական պատվեր կա»։
«Ես բացառում են քաղաքական որևէ ենթատեքստ այս առումով, և որևիցե մեկին մեղադրանք չի ներկայացվել։ Ընդհանրապես, խոսքը գնում է նրա մասին, որ պետք է պարզվեն որոշ հանգամանքներ։ Եվ ցանկացած Հայաստանի Հանրապետության քաղաքացի համագործակցում է մեր ազգային անվտանգության կառույցների հետ, որպեսզի, եթե կան տեղեկատվություններ, որոնք անհրաժեշտ է ստուգել, որպեսզի ստուգենք և վստահ լինենք, որ որևիցե ռիսկեր այդտեղ չկան։ Եվ որևիցե քաղաքական ենթատեքստ պետք չէ որոնել», – այսօր «Ազատություն» ռադիոկայանի հետ զրույցում ասել է Տիգրան Սարգսյանը։
«Մեկ այլ երևույթ էլ կա. երբ որ հասարակության մեջ պետությունը փորձում է ինչ-ինչ գործառույթներ իրականացնել` բացահայտելու այս կամ այն տեղեկատվության տակ թաքնված երևույթները, միանգամից առաջ է մղվում այն հանգամանքը, որ սա քաղաքական ենթատեքստ ունի», – ընդգծել է վարչապետը` ամփոփելով. – «Ուզում եմ հավաստիացնել, որ որևիցե քաղաքական ենթատեքստ չկա»։
