ԲՀԿ նախագահ Գագիկ Ծառուկյանը «Կենտրոն» հեռուստաընկերության եթերում հայտարարել է, որ ասելով, թե Ռոբերտ Քոչարյանն ուզած ժամանակ կդառնար ՀՀԿ նախագահ, չի ցանկացել վիրավորել ո՛չ հանրապետականներին, ո՛չ ՀՀԿ նախագահին:
Քոչարյանի և ՀՀԿ-ի մասին Գագիկ Ծառուկյանի հայտարարությունն իսկական աժիոտաժ առաջացրեց քաղաքական դաշտում: Դա ընկալվեց որպես Ծառուկյանի ծանր հարվածը ՀՀԿ-ին և Սերժ Սարգսյանին:
Սերժ Սարգսյանը կամ ՀՀԿ առաջին տրամաչափի այլ գործիչներ դրան ի պատասխան չարձագանքեցին, փոխարենը «մեջլիս» մտան Էդուարդ Շարմազանովի, Ռազմիկ Զոհրաբյանի, Մանվել Բադեյանի կամ Հովհաննես Սահակյանի տրամաչափի գործիչները, որոնք սկսեցին Գագիկ Ծառուկյանին վարք ու բարք սովորեցնել:
Ծառուկյանի խոսնակ Խաչիկ Գալստյանն էլ հայտարարեց, որ Գագիկ Ծառուկյանը նրանց ասածների առնչությամբ ասելու բան չունի, քանի որ Ծառուկյանին միայն հեղինակավոր գործիչների կարծիքների մասին են զեկուցում: Դա կարծես թե վկայում էր այն մասին, որ Ծառուկյանը հաստատակամ է իր խոսքում, և նրա «խոսքն իսկապես գործ» է:
Բայց ահա ստացվում է, որ այնքան էլ այդպես չէ, ինչի վկայությունն էլ «Կենտրոնի» եթերում նրա բացատրությունն է, որն այլ կերպ, քան մեղայական, դժվար է անվանել: Բանն այն է, որ Ծառուկյանի համար գերադասելի կլիներ լռելը, քանի դեռ իրեն ՀՀԿ-ից չեն արձագանքել իր տրամաչափով, այսինքն՝ կուսակցական եթե ոչ բարձրագույն, ապա բարձր մակարդակով: Մինչդեռ այդպիսի մակարդակով արձագանքի բացակայության դեպքում հեռուստատեսային բացատրություններ տալը նշանակում է կապիտուլյացիա, գոնե՝ այս փուլի համար:
Դա նշանակում է, որ Ծառուկյանը պարզապես կամ չի համարձակվել էլ ավելի սրել ՀՀԿ հետ հակադրությունը և փորձել է թույլ չտալ դրա ծավալում, կամ էլ պարզապես նրան Սերժ Սարգսյանը հերթական վերջնագիրը կամ իր բառերով ասած` «պահանջն» է ներկայացրել, որից էլ Ծառուկյանը չի կարողացել խույս տալ:
Այդ դրվագը կարծես թե հուշում է, որ ԲՀԿ առաջնորդը այդքան էլ պատրաստ չէ ՀՀԿ հետ լուրջ պայքարի, դիմադրության, առերեսման: Մինչդեռ Ծառուկյանին թերևս հարկ է գիտակցել զարգացումների տրամաբանությունն ու ընդունել, որ այդ պայքարը անխուսափելի է, եթե ինքը չի ցանկանում «կերակուր» դառնալ ՀՀԿ-ի համար:
Տեղատվության քաղաքականությունը Ծառուկյանի համար կարող է ընդամենը լուծել ՀՀԿ-ի կամ Սերժ Սարգսյանի սեղանին որպես «առաջին», «երկրորդ» կամ որպես «դեսերտ» մատուցվելու հարցը, ոչ ավելին:
Լուսանկարը՝ PanArmenianPhoto-ի
