Երեկ կայացան Իսպանիայի գավաթի խաղարկության կիսաեզրափակիչ պատասխան հանդիպումները: Եթե առաջին հանդիպումից հետո կատալոնացիների եզրափակիչ դուրս գալը կասկած չէր հարուցում, ապա մադրիդցիներն առաջին խաղում ընդամենը մեկ գնդակի տարբերությամբ էին հաղթել «Սևիլիա»-ին, հետևաբար, այստեղ ամեն ինչ պետք է որոշվեր պատասխան հանդիպումից հետո:
Երկու մարզիչներն էլ իրենց լավագույն կազմերն էին խաղադաշտ դուրս բերել: Հանդիպումը, ինչպես և սպասվում էր, անցավ չափազանց լարված և սուր պայքարում: «Արքայական» ակումբն առավելություն ուներ, բայց լավ հնարավորություններ ունեին նաև «Սևիլիա»-ի ֆուտբոլիստները, հատկապես շատ վտանգավոր էր գործում Ալվարո Նեգրեդոն:
Տանտերերի կազմում, ինչպես միշտ, ակտիվ էր Ռոնալդուն, բայց պորտուգալացու հարվածները ոչ մի կերպ չէին ընթանում դեպի դարպասը: Բենզեման մի քանի լավ հնարավորություն կորցրեց: Խաղավարտից 10 րոպե առաջ դեռ ոչինչ պարզ չէր, և Սևիլիայի մեկ գոլը կարող էր ամեն ինչ փոխել, բայց 82-րոպեին խաղն իր վրա վերցրեց Օզիլը. Գերմանիայի հավաքականի կիսապաշտպանը վարպետորեն ճեղքեց մրցակցի պաշտպանությունը, շրջանցեց դարպասապահին և գնդակն ուղարկեց անպաշտպան դարպասը:
Եվ միայն խփած գոլից հետո Մոուրինյոն հանդգնեց խաղադաշտ դուրս բերել թիմի նորեկ Ադեբայորին, որն էլ մրցավարի կողմից ավելացված ժամանակի վերջին րոպեին դրեց հանդիպման վերջակետը` «Ռեալ»-«Սևիլիա»` 2:0:
Մյուս կիսաեզրափակիչում «Բարսելոնա»-ն հերթական հեշտ հաղթանակը տոնեց: Առաջին խաղի 5:0-ից հետո Գվարդիոլան հանգստանալու հնարավորություն էր տվել հիմնական կազմի գրեթե բոլոր ֆուտբոլիստներին, ինչը սակայն ոչ մի կերպ չազդեց կատալոնացիների ցուցադրած խաղի որակի վրա: Հանդիպումն ավարտվեց 0:3 հաշվով, գոլերի հեղինակներ դարձան Ադրիանոն, Ալկանտարան և Աֆելայը:
Այսպիսով, ապրիլի 21-ին Իսպանիայի գավաթի եզրափակիչում կհանդիպեն «Բարսելոնա»-ն ու«Ռեալ»-ը:
