Երեկ կայացած Անգլիայի առաջնության 25-րդ տուրի չորս հանդիպումներում անակնկալներ չգրանցվեցին. 5 առաջատարներից խաղադաշտ դուրս եկած 3 թիմերն էլ հաղթանակներ տարան:
«Արսենալ»-ը «Էմիրեյթս»-ում կամային հաղթանակ տարավ «Էվերտոն»-ի նկատմամբ: 24-րդ րոպեին հանդիպման հաշիվը բացեց Լուի Սահան, ինչից հետո Վենգերի սաները ոչ մի կերպ չէին կարողանում ճեղքել հյուրերի պաշտպանությունը, մինչև իր խոսքը չասաց ինքը` Վենգերը: Ֆրանսիացի մասնագետը 62-րդ րոպեին Ռոսիցկու փոխարեն խաղադաշտ մտցրեց Արշավինին, որը 8 րոպե անց հավասարեցրեց հաշիվը:
Վենգերի կատարած երկրորդ փոփոխությունը նույնպես շատ տեղին էր. Բենտների խաղադաշտ դուրս գալուց հետո «Արսենալ»-ի գրոհները շատ ավելի վտանգավոր դարձան: 75-րդ րոպեին անկյունայինի խաղարկումից հետո գլխի հարվածով հանդիպման վերջակետը դրեց Կոսիելնին: «Արսենալ»-«Էվերտոն»` 2:1:
Մրցաշարային աղյուսակի առաջատար «Մանչեսթր Յունայթեդ»-ն «Օլդ Թրաֆորդ»-ում 3:1 հաշվով հեշտ հաղթանակ տարավ «Ասթոն Վիլլա»-ի նկատմամբ:
Վերջապես իր ուժերի համապատասխան խաղ ցուցադրեց «սատանաներ»-ի առաջատար Ուեյն Ռունին, որը 45 րոպեում ավելի շատ գոլ խփեց, քան անցած 9 ամիսների ընթացքում: Նա աչքի ընկավ առաջին խաղակեսի առաջին և վերջին րոպեներին: 59-րդ րոպեին Դարեն Բենթը վերադարձրեց խաղի ինտրիգը, բայց չորս րոպե անց Նեմանյա Վիդիչը վերջնականապես մարեց այն:
«Չելսի»-ն հյուրընկալվելիս 2:4 հաշվով առավելության հասավ «Սանդերլենդ»-ի նկատմամբ: «Ազնվականներ»-ը հատուկ տրամադրվածությամբ էին խաղադաշտ դուրս եկել. Նրանց անհաջողությունները սկիզբ առան հենց «Սանդերլենդ»-ից 0:3 հաշվով կրած պարտությունից հետո:
Չնայած հաշիվը բացեցին «Սանդերլենդ»-ի ֆուտբոլիստները, և առաջին խաղակեսից հետո գրանցվեց 2:2 արդյունք. Անչելոտտիի սաների առավելությունը բացահայտ էր:
Երկրորդ խաղակեսում «Չելսի»-ն երկու անպատասխան գնդակ ուղարկեց հյուրերի դարպասը և ոչ մի շանս չտվեց նրանց: «Ազնվականներ»-ի կազմում մեկական անգամ աչքի ընկան Լեմպարդը, Կալուն, Թերին և Անելկան:
Երեկ կայացած ևս մեկ խաղում գրանցվեց ոչ ոքի արդյունք. «Վեսթ Բրոմվիչ»-ն ու «Ուիգան»-ը երկուական գնդակ ուղարկեցին միմյանց դարպասները: 25-րդ տուրի մյուս վեց հանդիպումները կկայանան այսօր:
