Իտալիայի առաջնության 22-րդ տուրում առաջատարները միավորներ չկորցրին: «Միլան»-ը հյուրընկալվելիս մեծ դժվարությամբ հաղթահարեց «Կատանիա»-ի արգելքը. հանդիպման 54-րդ րոպեին «Միլան»-ի նորեկ Մարկ վան Բոմելը ոչ այնքան կոպիտ խաղի համար ստացավ երկրորդ դեղին քարտը և հեռացվեց խաղադաշտից: Բոմելի հեռացումից զայրացած միլանցիներն այդ պահից ի վեր սկսեցին բոլորովին այլ ֆուտբոլ ցուցադրել: 58-րդ րոպեին Ռոբինյոն բացեց խաղի հաշիվը: 85-րդ րոպեին Իբրահիմովիչը կրկնապատկեց այն, իսկ սիցիլիացիներն այդպես էլ չկարողացան գոնե մեկ վտանգավոր գրոհ կազմակերպել Աբիատիի դարպասի մոտ:
Շաբաթ օրվա մյուս խաղում երրորդ տեղում ընթացող «Լացիո»-ն սեփական հարկի տակ Կոզակի դուբլի շնորհիվ 2:0 հաշվով հեշտ հաղթանակ տարավ «Ֆիորենտինա»-ի նկատմամբ:
Կիրակնօրյա հանդիպումներից առանձնակի ուշադրության է արժանի «Ինտեր»-ի և «Պալերմո»-ի դիմակայությունը: Վաղուց նման հետաքրքիր ու իրադարձություններով հարուստ հանդիպում չէր եղել Իտալիայի առաջնությունում: Հանդիպման արդեն 5-րդ րոպեին Ֆաբրիցիո Միկոլին առաջ մղեց «Պալերմո»-ին, ինչից հետո հյուրերն անցան խուլ պաշտպանության, իսկ «Ինտեր»-ը բնականաբար մեծ ուժերով նետվեց առաջ: 30 րոպե Սեզարի դեմքը չտեսնելուց հետո Դելիո Ռոսսիի սաները լավ հակագրոհելու հնարավորություն ստացան և դարպասի ուղղությամբ նրանց կատարած երկրորդ հարվածը նույնպես ավարտվեց գոլով: Մինչև ընդմիջումը հյուրերը կարող էին հաշիվն անպարկեշտ դարձնել, բայց Սեզարի հետ մեն մենակ մնացած Միկոլիի հարվածից հետո գնդակը դիպավ դարպասաձողին:
Ընդմիջումից հետո Լեոնարդոն խաղադաշտ մտցրեց երկու նորեկներին` Ջանպաուլո Պացցինիին` Կոուտինյոյի փոխարեն և Հուսսեին Հարժային, որը փոխարինեց Դավիդ Սանտոնին: Ամբողջ երկրորդ խաղակեսն անցավ փոխնիփոխ գրոհներով: Մի քանի անգամ սիցիլիացիներին փրկեց դարպասապահ Սալվատորե Սիրիգուն, բայց 57-րդ րոպեին նա էլ անզոր գտնվեց Պացցինիի հարվածի դեմ: 63-րդ րոպեին «Պալերմո»-ին կրկին հնարավորություն ընձեռվեց երկու գնդակի տարբերությունը վերականգնելու, բայց Սեզարը ետ մղեց Պաստորեի իրացրած 11 մետրանոց հարվածը: 74-րդ րոպեին նույն Պացցինին գլխի հարվածով եզրափակեց Մայկոնի փոխանցումը: Մեկ րոպե անց Ջանպաուլոն իր թիմի համար 11 մետրանոց հարվածի իրավունք վաստակեց: Էտոոն հանդիպման հերոսին թույլ չտվեց դառնալ հեթտրիկի հեղինակ, բայց ինքը դիպուկ հարվածեց նշակետից` 3:2: Այդուհետ վտանգավոր պահերի տեսահոլովակ հիշեցնող խաղը հանգստացավ. միլանցիները սկսեցին ավելի շատ ուշադրություն դարձնել պաշտպանությանը, իսկ «Պալերմո»-ն այդպես էլ չկարողացավ ուշքի գալ կատարվածից հետո:
Մրցաշարային աղյուսակի երկրորդ տեղում ընթացող «Նապոլի»-ն 4:0 հաշվով ջախջախեց «Սամպդորիա»-ին: Էդիսոն Կավանին դարձավ հեթտրիկի հեղինակ և ռմբարկուների պայքարում շրջանցեց «Ուդինեզե»-ի հարձակվող Անտոնիո Դի Նատալեին:
«Յուվենտուս»-ը շարունակում է հիասթափեցնել իր երկրպագուներին: «Ուդինեզե»-ի հետ խաղում թուրինցիներն առաջինը հաջողության հասան, բայց այնուհետև երկու գնդակ ընդունեցին սեփական դարպասն ու այս մրցաշրջանում կրեցին իրենց 5-րդ պարտությունը: Այս հաղթանակից հետո «Ուդինեզե»-ն մրցաշարային աղյուսակում շրջանցեց «Յուվենտուս»-ին և բարձրացավ 6-րդ հորիզոնական:
22-րդ տուրի մյուս հանդիպումներում գրանցվեցին հետևյալ արդյունքները` «Բրեշիա»-«Կևո»` 0:3, «Կալյարի»-«Բարի»` 2:1, «Ջենոա»-«Պարմա»` 3:1, «Լեչե»-«Չեզենա»` 1:1։ «Բոլոնիա»-«Ռոմա» հանդիպումը հետաձգվել է առատ տեղացող ձյան պատճառով:
