ԱՄՆ իշխանությունները հայտարարել են, որ Վաշինգտոնն ու Իսլամաբադը շուտով համաձայնության կգան Պակիստանի տարածքով Աֆղանստանում ՆԱՏՕ-ի զորամիավորումների համար նախատեսված ապրանքների տարանցման հարցի շուրջ։ Այս մասին հաղորդում է BBC-ն։
Ավելի վաղ հայտնի էր դարձել, որ Պակիստանի նախագահ Ասիֆ Ալի Զարդարին համաձայնել է մասնակցել Չիկագոյում կայանալիք ՆԱՏՕ-ի գագաթնաժողովին։
Հիշեցնենք, որ պակիստանյան կողմն արգելել էր ամերիկյան բեռների տարանցումը իր տարածքով այն բանից հետո, երբ անօդաչու ինքնաթիռը ոչնչացրել էր պակիստանցի 24 զինվորականների։ Բացի այդ, երկկողմ հարաբերությունները սրվել էին Պակիստանի տարածքում Ուսամա բեն Լադենի սպանությունից հետո, երբ ամերիկացիները չէին զգուշացրել այդ մասին իրենց պակիստանցի գործընկերներին։
