Վաստակավոր նկարիչ Հաղթանակ Շահումյանը կարծում է, որ հայ գեղանկարչության մեջ բազմաթիվ նկարներ կան, որոնք արտացոլում են Արցախյան պատերազմը.
«Գիտեք, նկարչության մեջ պարտադիր չի անունը դրվի պատերազմ կամ հաղթանակ, որ իմանանք պատերազմի մասին նկար է: Անունը կարող է ոչ անմիջական կապ ունենալ: Ես գործեր ունեմ, որոնք նվիրված են ղարաբաղյան շարժմանը, բայց այլ անուններով` «Ոլորապտույտ», «Հորձանուտ» և այլն, անունն ուղղակի հուշում է, իսկ նկարը իր մեջ կրում է մեր ապրած ժամանակները:
Հիմնականում արվում են պորտրետային շարքեր: Բոլոր նկարիչների մոտ էլ կարող եք պորտրետներ տեսնել, որովհետև այն ժամանակ ոչ ոք անտարբեր չէր, բոլորը նկարում էին իրենց հարազատ հրամանատարների, զինվորների դիմանկարները»:
Նկարիչը, շնորհավորելով հայ զինվորներին, սպաներին, նշեց, որ բանակը ժողովրդինն է, և այն պետք է լինի ժողովրդի հպարտությունը. «Բանակը մերն է, և եթե բանակում կա հրաշալի, լավ առաջխաղացում, ապա դա մեր բոլորի ուրախությունն է, եթե լինում են թերացումներ, դրանք նույնպես մերն են:
Իրականում մենք բանակի նկատմամբ պետք է խանդոտ և շատ ուշադիր լինենք, որ մեր բանակը արժանի լինի մեր ժողովրդին, լինի մեր ժողովրդի հպարտությունը»:
