Իսպանացի լրագրողները հայտնում են, որ Մադրիդի «Ռեալ»-ի ղեկավարությունն ու Քուվեյթի ֆուտբոլի ֆեդերացիայի ներկայացուցիչները համաձայնության են հասել երկրի ազգային հավաքականի և «արքայական ակումբ»-ի միջև ընկերական հանդիպում անցկացնելու գործում:
Խաղը նշանակված է ընթացիկ տարվա մայիսի 16-ին, սակայն ժամկետը համաձայնեցված չէ Իսպանիայի ազգային հավաքականում հանդես եկող ֆուտբոլիստների հետ: Իսպանիայի Լա Լիգայի վերջին հանդիպումից հետո նրանք նախատեսում էին հանգստանալ մինչև մայիսի 20-ը, երբ կմեկնարկեն երկրի ազգային հավաքականի մարզումները` Եվրոպայի 2012 թվականի առաջնության եզրափակիչ փուլին նախապատրաստվելու համար:
«Պայմանավորվածություն կա, որ ընկերական հանդիպմանը պետք է մասնակցեն «արքայական ակումբ»-ի բոլոր աստղերը: Այլ կերպ մենք պետք է պատրաստ լինենք վերադարձնել երկրպագուների` խաղը դիտելու համար գնված տոմսերի գումարները»,-հայտարարել է հանդիպման կազմկոմիտեի նախագահ Բադր Ալ-Միլեմը:
«Ռեալ»-ը նախատեսում է մեկնել Քուվեյթ հանդիպման օրը և նույն օրն էլ վերադառնալ Իսպանիա:
