ՀՖՖ մամլո ծառայությունն «Առաջին լրատվական»-ին երեկ տեղեկացրել էր, որ Հայաստանի ֆուտբոլի ֆեդերացիան նախնական պայմանավորվածություն է ձեռք բերել հոլանդացի մասնագետ Ռայմոնդ Վերհեյենի հետ`աշխատելու Հայաստանի ազգային հավաքականի մարզչական շտաբում:
Հայաստանի ազգային հավաքականի գլխավոր մարզիչ Վարդան Մինասյանը ՀՖՖ պաշտոնական կայքին ասաց, որ երբ նախնական պայմանավորվածությունը պաշտոնականացվի և հոլանդացի մասնագետ Վերհեյենը համալրի Հայաստանի ազգային հավաքականի մարզչական շտաբը, ինքը նոր միայն կխոսի նրա պարտականությունների մասին:
Իսկ De Telegraaf-ը տարածել էր տեղեկատվություն, որ 41-ամյա մասնագետն արդեն պայմանագիր է ստորագրել ՀՖՖ-ի հետ` նախատեսված մինչև 2014 թվականը` ևս երկու տարով երկարաձգելու հնարավորությամբ:
Ռայմոնդ Վերհեյենը ծնվել է 1971 թվականի նոյեմբերի 23-ին` Հոլանդիայում:
Վերհեյենը եղել է Հոլանդիայի, Ռուսաստանի, Հարավային Կորեայի մարզական շտաբերի անդամ, մասնակցել է աշխարհի և Եվրոպայի 3-ական առաջնությունների: Նա աշխատել է Լուի վան Գալի (2000-2001), Ֆրանկ Ռայկարդի (1998-2000թթ), Գուս Հիդդինկի (2001-2002, 2008) և Դիկ Ադվոկատի (2005-2006) հետ:
Հոլանդիայի և Հվ Կորեայի հավաքականները դուրս եկան կիսաեզրափակիչ: Ռուսաստանի հավաքականը դուրս եկավ «Եվրո-2008»-ի կիսաեզրափակիչ, իսկ քառորդ եզրափակչում ավելացված ժամանակում 2 գնդակ խփեց Հոլանդիայի ազգային ընտրանու դարպասը: «Նրա հետ առաջին մարզումներից հետո մենք դժվարությամբ էինք քայլում»,- հայտարարել էր Ռուսաստանի հավաքականի հարձակվող Ռոման Պավլյուչենկոն:
«Եվրո-2008»-ից հետո ՈւԵՖԱ-ն հրապարակեց ֆուտբոլիստների` խաղադաշտում կատարած ֆիզիկական աշխատանքի վիճակագրությունը: Առաջին հնգյակում Ռուսաստանն ուներ 4 ներկայացուցիչ. առաջին տեղում էր Սերգեյ Սեմակը, ու նախորդում էին Կոնստանտին Զիրյանովը, Յուրի Ժիրկովը, Միխայել Բալլաքը (Գերմանիա) և Իգոր Սեմշովը:
«Ես մշակել եմ հատուկ փիլիսոփայություն և աշխատանքային եղանակ. «Մենք ոչ թե պետք է բարելավենք մեր ֆիզիկական վիճակը, որպեսզի խաղանք, այլ խաղում ենք, որպեսզի բարելավենք ֆիզիկական վիճակը»,- euro2008.com-ին տված հարցազրույցում հայտարարել էր մասնագետը:
Նա աշխատել է մի շարք Եվրոպական հանրահայտ ակումբներում` կատալոնական «Բարսելոնա»-ում, Սանկտ-Պետերբուրգի «Զենիթ»-ում, Անգլիական «Չելսի»-ում, «Մանչեսթեր Սիթի»-ում և հոլանդական «Ֆեյենորդ»-ում: Նա եղել է նաև «Լիվերպուլ»-ի հանրահայտ կիսապաշտպան Քրեյգ Բելամիի անձնական ֆիզպատրաստման մարզիչը:
1998 թվականին Վերհեյենը հրատարակեց ձեռնարկ` «Conditioning in soccer» (Ֆուտբոլիստների ֆիզիկական տվյալների բարելավում), որը մեծ մասսայականություն է վայելում:
2011 թվականի փետրվարին նա նշանակվեց Ուելսի ազգային հավաքականի գլխավոր մարզչի օգնական: Թիմի գլխավոր մարզիչ Հարրի Սփիդի` նոյեմբերին կատարած ինքնասպանությունից հետո Վերհեյենը հայտարարեց, որ ցանկանում է գլխավորել երկրի ազգային հավաքականը: Ի վերջո՝ գլխավոր մարզչի պաշտոնում նշանակվեց 41-ամյա մասնագետ, «Ֆուլհեմ»-ի նախկին գլխավոր մարզիչ Քրիս Քոլումենը, որից հետո Ուելսի ազգային հավաքականի մի շարք ֆուտբոլիստներ` Աարոն Ռեմսիի գլխավորությամբ, հայտարարեցին, որ «իրենց խաբված են զգում»: 2012 թվականի փետրվարին Ռայմոնդը հրաժարական տվեց: Մասնագետն աշխատել է նաև Հայաստանի ազգային հավաքականի դարպասապահ Ռոման Բերեզովսկու հետ, երբ 2012 թվականի ԱՄԷ-ի միջմրցաշրջանային ուսումնամարզական հավաքի ժամանակ օգնում էր Մոսկվայի «Դինամո»-ի գլխավոր մարզիչ Սերգեյ Սիլկինին:
