Մայիսի 7-ից Հայաստանի ֆուտբոլի ֆեդերացիան սկսել է մարզչական բարձրագույն Pro արտոնագրի դասընթացը: Դասընթացի ղեկավար, ՈՒԵՖԱ-ի տեխնիկական հրահանգիչ, Հայաստանի երիտասարդական հավաքականի նախկին գլխավոր մարզիչ Ֆլեմինգ Սերիցլևը հարցազրույց է տվել ՀՖՖ պաշտոնական կայքին:
-Պարո՛ն Սերիցլև, որքանո՞վ է կարևոր մարզչական Pro արտոնագիր ունենալու հանգամանքը:
-Նշեմ, որ Pro արտոնագիրն ամենամարձր մարզչական արտոնագիրն է, որը շնորհվում է ՈՒԵՖԱ-ի կողմից: ՈՒԵՖԱ-ն ունի երեք տեսակի արտոնագիր B, A և Pro: Այն մարզիչները, ովքեր արժանանում են Pro արտոնագրի, հնարավորություն են ստանում ամենաբարձր մակարդակով աշխատելու ՈՒԵՖԱ-ի բոլոր անդամ երկրներում: Այս դասընթացին իրավունք ունեն մասնակցել միայն այն մարզիչները, ովքեր առնվազն մարզչական A կարգի արտոնագիր ունեն և զբաղեցնում են գլխավոր մարզչի պարտականությունները կամ մոտ են դրան: Սա չափանիշ է, որ պետք է պահպանվի: Հայաստանի ֆուտբոլի ֆեդերացիան իրավունք է ստացել անցկացնելու Pro արտոնագրի դասընթացը, քանի որ ՈՒԵՖԱ-ն շատ գոհ է եղել այն արդյունքներից, որոնցով Հայաստանի ֆուտբոլի ֆեդերացիան անցկացրել է մարզչական A արտոնագիրը ստանալու դասընթացը: Դրանից հետո է միայն իրավունք տրվել անցկացնելու Pro-ի դասընթաց: Բոլոր պարապմունքները տեղի են ունենալու ՀՖՖ տեխնիկական կենտրոնում` Ֆուտբոլի ակադեմիայում: Հատուկ ուզում եմ նշել, որ Հայաստանն ունի շատ լավ Ֆուտբոլի ակադեմիա, որը չափազանց հարմար ենթակառուցվածք է մարզչական դասընթացներ անցկացնելու համար:
-Ի՞նչ խաճախականությամբ են անցկացվելու դասախոսությունները:
-Դասախոսություններն անցկացվելու են յուրաքանչյուր ամիս երկուսից երեք օր, քանի որ այս դասընթացում ընդգրկված է 12 գլխավոր մարզիչ: Այս տարվա և 2013-ի ամռանը լինելու են նաև մեկշաբաթյա դասեր: Այս ամռանը մենք նաև մեկնելու ենք Լեհաստան, որտեղ դիտելու ենք Եվրոպայի առաջնության երկու խմբերի հանդիումները: Մենք 11 oր շարունակ կհետևենք հանդիպումներին և երբ վերադառնանք Հայաստան, կվերլուծենք այն ամենը ինչ տեսել ենք՝ խաղերը, թիմերը, առանձին ֆուտբոլիստների և այլն: Նախատեսվում է նաև 2013 թվականի փետրվար-մարտ ամիսներին երկու խմբով` վեցական մարզչով մեկնել հավանաբար Անգլիա և հետեւել պրեմիեր լիգայի խաղերին:
