Թվում էր, թե ԱԺ երեկվա ընտրություններից հետո, երբ պարզվեց, որ իշխանությունները պատրաստ են ՀԱԿ-ին լարվածության մեջ պահել և վե՞ց, թե՞ յոթ տոկոսի սպասման ծանր րոպեներ պարտադրել, այսօր գոնե ՀԱԿ համակիրները կսթափվեն և կփորձեն բացատրություն փնտրել, թե ինչպես ստացվեց, որ ՀԱԿ պատասխանատուների մի քանի շաբաթյա ինքնավստահ հայտարարությունները, թե` «ՀԱԿ-ը 46 տոկոս հավաքելու հավակնություն ունի», կամ` «ՀԱԿ-ը կհավաքի 50+1% ձայներ», իրականություն չդարձան:
Իրականությունը, սակայն, պարզվում է բոլորովին այլ է: Այսօր ոչ միայն ՀԱԿ-ը և նրա համակիրները փորձ էլ չեն անում կոչ անել ՀԱԿ վերնախավին թույլ տված սխալներն ուղղել, օրինակ` մանդատները վայր դնել և փողոցային պայքար սկսել՝ առանց հույս դնելու ՀՀԿ-ի հետ երկխոսելու կամ Ռոբերտ Քոչարյանի ֆավորիտ կուսակցության` ԲՀԿ-ի հետ օրինականություն հաստատելու փորձերի, այլև պարզվում է, որ վեց-յոթ կոնգրեսականի խորհրդարան մտցնելը իսկապես ինքնանպատակ է:
Facebook սոցիալական ցանցի` «Պայքար, պայքար մինչև վերջ» խմբում, որը համարվում է ՀԱԿ-ի ոչ պաշտոնական խումբը, և այստեղ են գրանցված ՀԱԿ-ի մեծ թվով համակիրներ, արդեն սկսվել են քննարկումներ, թե ովքեր պետք է վայր դնեն իրենց մանդատները, որպեսզի ՀԱԿ ցուցակի հաջորդող համարներն անցնեն խորհրդարան: Մի կողմ դնենք այն, որ դրանք, ամենայն հավանականությամբ, ՀԱԿ-ի որոշ թևերից հրահանգավորված մեսիջներ են, և փոխանակ համատարած կեղծված ընտրությունները վիճարկելու հարց բարձրացվի` բանը հասել է նրան, որ այսօր քննարկվում է այն հարցը, թե ով է ԱԺ մտնելու համար ավելի հարմար:
Նշյալ խմբի անդամ Vahe Aghaqaryan օգտատերը այսօր գրել է. «ՀԱԿ-ը էս 6 հոգով ոչ մի բան չի կարող անել, բայց եթե 2-6-րդ տեղերում գտնվողներից 3-ը տեղերը զիջեն Փաշինյանին, Բագրատյանին ու Ջհանգիրյանին, ապա մենակ իրանք` Լևոն Տեր-Պետրոսյանի հետ, կկարողանան իսկական հեղափոխություն անել ԱԺ-ում»: Ինչպես ասում են`մեկնաբանություններն ավելորդ են… Այսինքն` ՀԱԿ-ի ներսում փաստացի կոչ են անում, որպեսզի ՀԺԿ առաջնորդ Ստեփան Դեմիրճյանը, «Հանրապետություն» կուսակցության առաջնորդ Արամ Սարգսյանը զիջեն իրենց տեղերը նախկին զինդատախազ Գագիկ Ջհանգիրյանին:
Մենք էլ հակընդդեմ հարց ենք ուղղում՝ իսկ եթե Գագիկ Ջհանգիրյանը, Շարժման շահերից ելնելով, ՀԱԿ-ի համամասնական ցուցակից դուրս գար և պայքարեր որպես մեծամասնական թեկնածու` գուցե ավելի՞ նպաստավոր լիներ ՀԱԿ-ի համար…
