Մայիսին Անգլիայի հարավ-արևելքում գտնվող Սենդվիչ քաղաքը կնշի համանուն կերակրատեսակի ստեղծման 250-ամյակը:
Ինչպես տեղեկացնում է Euromag-ը՝ սենդվիչի հեղինակը տեղի կոմսն է: Ըստ լեգենդի՝ Սենդվիչի 4-րդ կոմսը մոլի տարված էր թղթախաղով: Նա ժամերով չէր կարողանում կտրվել խաղասեղանից, նույնիսկ երբ սոված էր:
1762 թվականին նրա մոտ հեղափոխական միտք հղացավ: Կոմսը հրամայեց ծառաներին հացի երկու կտորների մեջ ռոստբիֆ դնել, որպեսզի կարողանա ընթրել՝ առանց խաղից կտրվելու: Այդպես էլ ստեղծվել է սենդվիչը:
Մայիսի 12 և 13-ին քաղաքում տոն է: Միջոցառումների ընթացքում կցուցադրվի սենդվիչի ստեղծման թատերական ներկայացում, տեղի կունենա համերգ և բուտերբրոդների մրցույթ: Տոնական միջոցառումներին կմասնակցի Սենդվիչի 11-րդ կոմսը՝ Ջոն Մոնտեգյուն, որդու՝ Օռլանդոյի հետ:
Սենդվիչ քաղաքը հայտնի է ոչ միայն իր խոհանոցային անցյալով: Քաղաքի պատմական կենտրոնը համարվում է լավ պահպանված միջնադարյան քաղաքը, որը գտնվում է պետական պահպանության ներքո:
Սենդվիչի կենտրոնում չկա հուշանվերների և ոչ մի խանութ, սակայն մսի և հացաբուլկեղենի խանութները շարունակում են աշխատել այնպես, ինչպես մի քանի դար առաջ:
