ՊԱԿ-ի (КГБ) նախկին աշխատակից Ալեքսանդր Լիտվինենկոյի կինը նրա սպանությունից 6 տարի անց էլ սպասում է իր հարցերի պատասխաններին:
Ինչպես գրում է The Independent-ը, մարտին Մարինա Լիտվինենկոն գնացել էր Լոնդոնում ՌԴ դեսպանատուն` քվեարկելու Պուտինի դեմ:
«Նա օգտվել է ձայնի իրավունքից առաջին անգամ այն ժամանակից ի վեր, երբ 12 տարի առաջ նա և իր հանգուցյալ ամուսինը Մեծ Բրիտանիայում քաղաքական ապաստան էին խնդրել»,- գրել է հոդվածագիր Թիմ Ուոկերը:
Լիտվինենկոն խոստովանել է, որ իրեն ոգևորել են Մոսկվայում բողոքի զանգվածային ցույցերը: «Ես տեսնում եմ Սաշային (ընդդիմադիր շարժման մեջ): Ես գիտեմ, թե ինչ տենչով նա այս ամենին կվերաբերվեր, ինչ մեծ օգուտ կբերեին նրա գիտելիքները»,- պատմել է նա:
Հնարավոր է` Մարինա Լիտվինենկոյին մատչում չի տրամադրվի իր ամուսնու գործի հետաքննությանը, գրում է Ուոկերը:
Ալեքսանդրի մահից երկու տարի անց նրա ընկերները համոզում էին Մարինային խաչ քաշել քրեական հետաքննության վրա: «Նրանք ասում էին, որ արդարությունը երբեք չի հաղթանակի: Ես մնացել էի հետաքննիչների, որոնք չէին ցանկանում գործը հետաքննել, և իմ ընկերների, որոնք հավանության էին արժանացնում այդ գաղափարը, արանքում»,- ասել է նա: Ի վերջո, նա համարձակվել էր պահանջել հետաքննություն անցկացնել, սակայն ընդգծել է, որ փաստաբանի ծառայությունները բավական թանկ արժեն` 100-200 հազար ֆունտ ստերլինգ:
«Մի կողմից`ես ուզում եմ, որ հետաքննությունն սկսվի որքան հնարավոր է՝ արագ, մյուս կողմից` ես պետք է վստահ լինեմ, որ ի վիճակի եմ վճարել»,- նկատել է Մարինան:
«2006-ից սկսած` նա իր ամբողջ ուժերը ներդնում է իր հանգուցյալ ամուսնու` Litvinenko Justice հիմնադրամում, որը ղեկավարում է իր ընկեր Ալեքս Գոլդֆարբի հետ և դաստիարակում է Անատոլի որդուն»,- նշված է հոդվածում:
Մարինան ոչ մի անգամ չի վերադարձել Ռուսաստան: «Այնտեղ մինչ օրս ԶԼՄ-ներում շարունակվում է Ալեքսանդրի վարկաբեկման արշավը»,- նկատում է հոդվածագիրը:
ՊԱԿ-ի նախկին աշխատակից Ալեքսանդր Լիտվինենկոն մահացել է 2006 թ. նոյեմբերի 23-ին կյանքի 44-րդ տարում՝ բրիտանական քաղաքացիություն ստանալուց անմիջապես հետո, Լոնդոնի հիվանդանոցում, ռադիոակտիվ պոլոնիում-210-ով թունավորման հետևանքով:
Նրա մահվանից հետո բրիտանական առողջության պահպանության գործակալության մասնագետները պնդում էին, որ վերջինիս օրգանիզմում հայտնաբերել են մեծ քանակությամբ պոլոնիում-210 ռադիոակտիվ տարր:
«Լիտվինենկոյի գործով» հիմնական մեղադրող է համարվում Անդրեյ Լուգովոյը:
