«Գործարար կանանց ասոցիացիայի» նախագահ, ԱԺ հանրապետական պատգամավոր Հերմինե Նաղդալյանին պատկանող խանութներում առհասարակ կտրոններ չեն տրամադրում։ Օրինակ՝ Դավիթաշեն վարչական շրջանի «Հեղնար» կոչվող սուպերմարկետում, որը բոլորին հայտնի է, որպես Հերմինե Նաղդալյանի սուպերմարկետ, կտրոններ չեն տրամադրում։ Բնականաբար, խանութի իրական սեփականտերը ինքն է, սակայն սեփականությունը ուրիշի անվան տակ է ձևակերպված։ Մի անգամ նույնիսկ խանութը կտրոններ չտրամադրելու համար որոշ ժամանակով փակվեց, սակայն այն շարունակում է գործել և կտրոններ չտրամադրել։ Հարակից շենքերի բնակիչներն ասացին, որ իրենք առհասարակ կտրոններ չեն էլ հավաքում, պարզապես ամենաթող վիճակն է իրենց նյարդայնացնում։ Ավելին, իրենց այն հարցապնդումներին, թե այդ ինչպես է, որ սուպերմարկետում կտրոններ չեն տրամադրվում, ստանում են հետևյալ պատասխանը. «Սուպերմարկետը Հերմինե Նաղդալյաննին է»։ Շատ հետաքրքիր է, խստության մարմնավորում վարչապետ Տիգրան Սարգսյանն այս մասին չգիտի՞, որ մի քանի նկատողություն էլ, ջենտլմենությունը մի կողմ դնելով, Հերմինե Նաղդալյանին անի։ Ինչևէ, հանգամանքների բերումով, այսօր մանր ու միջին բիզնեսմենները բիզնեսն են շալակած տանում և շատ հաճախ տեղ չեն հասնում, իսկ Հերմինե Նաղդալյանը բիզնեսի շալակն է ելել ու իրեն բարձունքում լավ է զգում։
