ՀԱԿ-ը թե՛ մեծամասնական, թե՛ համամասնական հսկայական ձայներ ունի: Այսօր «Առաջին լրատվական»-ի հետ զրույցում ասաց թիվ 11-րդ ընտրատարածքում առաջադրված ՀԱԿ թեկնածու Արշակ Բանուչյանը`անդրադառնալով սոցիոլոգ Ահարոն Ադիբեկյանի այն տվյալներին, թե ՀԱԿ-ը մեծամասնական տեղեր չի ունենալու նոր գումարման խորհրդարանում:
Նա նշեց, որ Ահարոն Ադիբեկյանի սոցհարցումները միշտ եղել են քաղաքական գործընթացների վրա ազդելու և ոչ իրավիճակը ներկայացնելու համար: «Ես վստահ եմ, որ ՀԱԿ-ը թե՛ մեծամասնական, թե՛ համամասնական հսկայական ձայներ ունի, և չեմ տեսնում ռիսկ ու չեմ հետևում այդ հարցումների արդյունքներին»,- նկատեց պատգամավորության թեկնածուն:
Արշակ Բանուչյանն ասաց, որ իր հնարավորությունները չի գնահատում, քանի որ գնահատում է խորհրդարանում մանդատներով պատգամավորներ ունենալու ժողովրդի հնարավորությունները: Նա կարևորեց այն, որ ժողովրդի քվեն տեղ հասնի: «Եթե ես կպարտվեմ, վստահաբար կպարտվեմ ժողովրդի հետ միասին: Իմ ընտրատարածքում ես միակ ընդդիմադիր թեկնածուն եմ, իսկ ժողովրդի քվեն ընդդիմադիր թեկնածուների օգտին է»,- տեսակետ հայտնեց Արշակ Բանուչյանը:
Հիշեցնենք, որ թիվ 11-րդ ընտրատարածքում առաջադրված է նաև ՕԵԿ անդամ Հեղինե Բիշարյանը, ԲՀԿ անդամ Գրիգորի Մարգարյանը, անկուսակցական Կարեն Սմբատյանը: