Չինացի կինեմատոգրաֆիստները YouTube-ից պահանջում են ուժեղացնել հեղինակային իրավունքի պաշտպանությունը: Նրանք հայտարարել են 308 մլն դոլարի վնասի մասին, որի պատճառը վիդեոհոսթինգում տեղադրված ծովահենային տեսանյութերն են: Այս մասին հայտնում է Agence France-Presse-ը: Կինոարտադրողները ներկայացրե՞լ են դատական հայց, թե՞ նոր են պատրաստվում դա անել՝ գործակալությունը չի հստակեցնում:
Կինոարտադրության հոնգկոնգյան ասոցացիան մեղադրել է YouTube-ին հեղինակային իրավունքների կոպիտ խախտման մեջ այն բանից հետո, երբ հայտնաբերել է, որ հոնգկոնգյան 200 ֆիլմերի, այդ թվում՝ նոր կինոնկարների հարյուրավոր հատվածներ ապօրինի ներբեռնվել են կայք: Ասոցացիայի տվյալներով՝ ընդհանուր առմամբ տեսագրությունները դիտվել են ավելի քան 40 միլիոն անգամ:
Ասոցացիայի նախագահ Բրայան Չանը հայտարարել է, որ հեղինակային իրավունքների խախտումների շարունակման դեպքում ներդրողները հետ կքաշվեն կինոարտադրության ոլորտից, ինչը վատ կանդրադառնա հոնգկոնյան ֆիլմերի քանակի և որակի վրա:
Ավելի վաղ գործակալությունը հայտնել էր, որ Համբուրգի դատարանը YouTube-ի վրա է բարդել օգտատերերի կողմից երաժշտական համադրմամբ տեսանյութերի տեղադրման և հեղինակային իրավունքների խախտման պատասխանատվությունը:
2011-ի մարտին Փարիզի դատարանը Google-ից 430 հազար եվրո գանձեց՝ հօգուտ ֆրանսիացի կիոնարտադրողների: Պատճառն այն էր, որ Google Video որոնումը հասանելի էր դարձրել կինոարտադրողների ֆիլմերի առանձին հատվածներ: