ՄԱԳԱՏԵ-ի գլխավոր տնօրեն Յուկիա Ամանոն, Associated Press գործակալության հետ ունեցած հարցազրույցում մատնանշելով, որ կազմակերպության հետ Իրանի համագործակցությունն անբավարար է եղել, հայտարարել է. «Մենք չենք կարող Իրանի չհայտարարած միջուկային աշխատանքների և, առհասարակ, ներկա միջուկային աշխատանքների խաղաղասիրական լինելու մասին վստահություն հայտնել: Իրանի միջուկային աշխատանքների մասին ՄԱԳԱՏԵ-ի տեղեկությունները շատ սահմանափակ են. դրանք միայն այն տեղեկություններն են, որոնք իրանական կողմը հայտնել է կազմակերպությանը: ՄԱԳԱՏԵ-ն Ղոմ քաղաքի մոտակայքում կառուցված միջուկային հաստատության մասին տեղեկացել է միայն այն ժամանակ, երբ դրա կառուցման աշխատանքներն ավարտին էին հասնում: Մենք, առհասարակ, իրանական կողմի՝ ուրանի հարստացման նոր ձեռնարկություններ կառուցելու մտադրությունների մասին իմացել ենք հենց իրանցի դիվանագետների հայտարարություններից և հստակ տեղեկություններ այդ մասին չունենք»։
Ամանոն վերջում նշել է. «ՄԱԳԱՏԵ-ը վստահ չէ՝ Իրանը ատոմային ռումբ պատրաստելու գաղտի ծրագիր ունի՞, թե՞ ոչ»։
Հարկ է նշել, որ Իրանի ազգային անվտանգության խորհրդի քարտուղար Սայիդ Ջալիլին թե՛ Ստամբուլի բանակցություններից առաջ և թե՛ հետո բազմիցս հայտարարել էր, որ ՄԱԳԱՏԵ-ի բազմաթիվ զեկույցներում ասված է, որ Իրանի միջուկային աշխատանքները խաղաղասիրական են: Ամանոյի այս հայտարարությունը կարելի է դիտել որպես անուղղակի պատասխան Ջալիլիի հայտարարություններին:
