Վաղը` ապրիլի 24-ին, «Ժառանգություն» կուսակցությունը քարոզարշավ չի իրականացնի, այլ ժամը 10-ին Ազատության հրապարակից կշարժվի Ծիծեռնակաբերդ` հարգելու Հայոց ցեղասպանության զոհերի հիշատակը: Այսօր կայացած մամուլի ասուլիսի ժամանակ այս մասին տեղեկացրեց «Ժառանգություն» կուսակցության նախագահ Րաֆֆի Հովհաննիսյանը` հավելելով, որ նախընտրական քարոզարշավի գնահատականը «Ժառանգությունը» կտա մայիսի 7-ին:
«Մինչ այդ մենք լծված ենք աշխատանքի: Ըստ երևույթին, ամբողջ այս ընթացքում նկատում ենք նաև խախտումներ, օրինակ՝ պետական սեփականություն հանդիսացող շենքերում առկա են կուսակցությունների, դրանց կարգախոսների պաստառներ, բացի այդ՝ տարբեր տեսակի բաժանումներ են իրականացվում»,- ասաց նա:
Պատասխանելով լրագրողներից մեկի հարցին՝ ինչո՞ւ է «Ժառանգությունը», ի դեմս ընտրությունների վերահսկման միասնական շտաբի աշխատանքների շուրջ անհամաձայնության, լարված հարաբերությունների մեջ ԲՀԿ-ի հետ, Հովհաննիսյանն ասաց.
«Մեզ համար կարևոր է, որ այս հարցում չլինեն անհատական կարծիքներ: Մենք ասել ենք, որ ոչ ժամավաճառության, ոչ էլ ձևական գործողությունների ժամանակ չունենք: «Ժառանգությունը» ի սկզբանե ներկայացրել է իր տեսակետն ու առաջարկները` ասելով, որ պատրաստ է միանալ շտաբի աշխատանքին»:
Հովհաննիսյանը հերքեց այն լուրերը, թե «Ժառանգությունն» օրերս հանդիպել է Սերժ Սարգսյանի հետ:
«Ոմանք փնտրում են քավության նոխազներ` ուրիշների միջոցով արդարանալու համար: Բայց ես ներում եմ բոլորին, ովքեր կեղծ ու անհիմն մեղադրանքներ են հնչեցնում իմ ու կուսակցության հասցեին»:
